立場新聞 Stand News

我們都是葉傲冬

2019/12/1 — 14:53

photo credit: 陳梓維FB, 立場新聞資料相

photo credit: 陳梓維FB, 立場新聞資料相

我成日都話:成長好痛苦。

痛苦在,我哋大部份人都需要至少十幾年(或畢生)時間,去摸索自己到底係個點嘅人,然後再用更多時間,了解「我」真正需要啲乜嘢(亦都可以係,成世人都渾渾噩噩,從來都唔知自己想點)。

你話做人幾無聊,窮一生都喺度追逐自己嘅尾巴。

廣告

我就同所有小朋友一樣,為咗「融入社會」,做咗好多自我調整。或者都算好彩,我算係一個比較聰明同自我意識強烈嘅人,好快我就學識,點樣飾演老師心目中嘅乖學生,講句點樣嘅嘢會討人歡心,點樣審時度勢,睇人眉頭眼額。

冇把握嘅嘢我唔做,對方唔示好我唔會主動 approach,明知會輸所以根本連落水都嫌煩。漸漸我哋做每一個決定都好謹慎,好理智,好多計算,亦越來越難相信任何童話或奇蹟。

廣告

「社會化」明明係為咗生存,但生存係咪就等於需要不斷計算,不斷妥協?

所以,我從小就好佩服一啲堅持忠於自己嘅人。呢啲人,講真未必有我咁聰明,甚至無法同人好好溝通,但佢哋有我呢一世人都欠缺嘅勇氣,就係完全唔理人講乜,唔理自己係咩新絲蘿蔔皮,只要佢哋相信一件事係啱嘅,就會義無反顧咁去做。即使呢種勇氣,可能只係有勇無謀,但至少佢哋有資格大大聲咁同我講:我就落咗水啦,你咁叻,咁你又做過啲乜?

望住陳梓維同葉傲冬嘅訪問,一個甩皮甩骨,講嘢 1999;一個自信企理,談吐得體,我忽然明白咗一樣嘢:我哋無時無刻恨不得踢走葉傲冬呢啲虛偽 smart ass,但當有人真係誤打誤撞踢走咗佢,我哋又嫌人蠢嫌人柒嫌人冇經驗。咁代表咩?代表我哋都早已被馴養成同葉傲冬一樣嘅虛偽 smart ass 囉。講就頭頭是道,要我做?OK 我了解吓先你望吓嗰邊。

講真,陳梓維同其他區議員新丁一樣,條路唔易行,冇人知四年後會唔會全部輸返,而即使我哋呢啲 smart ass 想幫手,都可能無從入手⋯⋯(明就明)但 smart ass 們請記住一樣嘢:有一班初生之犢代我哋做咗一啲我哋唔願做、唔敢做,甚至從來冇諗過去做嘅嘢,即使佢哋最終一敗塗地,呢個都係我哋嘅共同命運。

何況,件事有排都未完。不爭朝夕,放眼千秋。

作者網誌

發表意見