立場新聞 Stand News

我哋冇變小粉紅,因為知道乜嘢係真正自由 我哋不妥協要承受的後果,必然反饋到中共身上

2020/5/22 — 10:11

雖然我心情係差,不過想講翻個客觀形勢。其實而家就係叫攬炒。未知叫唔叫成功,但就係逼到中共用狠招。而越用狠招,對中共係越傷。

唔理中共係咪理性的問題,事實上佢出到國安法,係全世界都知佢打橫來。咁係對佢形象有打擊的。你可能覺得,大佬,中共仲有咩形象?但係國際上,真係好多人覺得中共未算好邪惡,好大問題。畢竟世界上咁多仆街,中共係咪仆街到要全世界一齊招呼呢?而每一次中共打橫來,佢就增加自己係全球仆街榜上的份量。累積到某個點,真係天怒人怨,咁先有全世界反中共大聯盟。(或者勢利d講,美帝反中共先有足夠的國際支持。國際支持越充足,美帝反共的力度就越大,時間越快。)

所以今次中共打橫來,正正係香港攬炒的結果。中共急於對香港全面控制,忍唔到要等香港建制派立廿三條。我哋反枱反得夠狠,令中共甘心放棄好多外資都要痛下殺手。呢d都係香港人奮力抗爭的成果。

廣告

設想下,如果香港好多中間派,好想大和解,唔想再鬥中共,咁香港就好似澳門咁,自己戴翻個廿三條金剛圈,結果一樣係比中共全面控制,又留住外資。最後我哋學識唔去碰中共的底線,就好似幾多小粉紅,覺得自己好自由,因為佢哋覺得唔鬧共產黨無問題,橫掂我都唔鬧共產黨,我咪無事囉。然後仲話自己「自由」,反過來話香港人攪事,不知感恩。

我哋冇變小粉紅,因為我哋知道乜嘢係真正嘅自由,同中共誓不兩立。所以國際上都見到中共點邪惡,點打壓我哋。

廣告

到呢一步,盤棋已經唔係香港人自己鬥中共。講白d,香港而家係美國嘅一張牌,用嚟招聚大義名份去同中共作帝國競爭。點樣用香港,用幾盡,係美國決定。香港人可以做的,係令呢張牌變強。

其實本來美國已經放棄咗香港,無諗住用香港攪中共。到今日美帝可以用香港玩中共,係因為香港人過去一直以來的抗爭所致。如果唔係因為香港人撐咁耐,打國際線打得咁好,得到咁多世人支持及同情,美國係無呢張牌可用的。所以香港人厲害,令美帝多咗呢張奇牌。

而中共應對的方式,就係要廢咗呢張牌(唔係直接廢香港),令美國再無得用香港攪中共。但呢個過程就會令中共受損,形象差,外資流失。而呢個正正就係攬炒啦!香港牌對中共威脅越大,中共就越急於用重手打壓香港,但越重手,對中共的損失就更大。

到呢個時候,又係香港人表現出不願妥協的時刻。面對極權,我哋絕不服從。後果會非常嚴重,但我哋承受的後果,亦必然反饋到中共身上。

香港人,共勉!

(標題為編輯所擬)

發表意見