人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/1/31 - 21:31

我好懷疑,當人地要block大陸人入境時,會唔計埋你香港入去

終於開始被人封你關唔俾你入了。

香港嘅抗疫表現,當然係讓人失望。不過即使呢段時間嘅抗疫表現好啲,我都依然好懷疑,當人地要block大陸人入境嘅同時,會唔計埋你入去。

特區政府呢十年,有幾傾向側重一國而輕兩制,國際社會有眼睇的。就算香港一個確診案例都冇,基於特區政府實質上毫無真正執政嘅自由,去到呢啲關乎人命安全嘅重大問題之時,邊個仲會肯信你?

廣告

假如你仍當香港係一個獨立地區去計數,除咗中國之外,呢一刻佢並唔係緊隨其後發病最多嘅地方。點解會封你唔封更多病例嘅地方,一、係根本就冇當過你係獨立地區去睇,你咪就係中國囉;二、如果當你係個獨立地區咁去睇的話,即是話,人哋係非常非常之唔睇好你,睇死你,疫情會同一齊被block嘅地方好快睇齊。前者也好後者也好,其實都係意味我地衰到貼地。

呢種衰法,唔係一朝一夕就可以發生到嘅,必須有一大班仆街長期以來不斷推進先有今日咁嘅「成就」。

#疫區之路

作者facebook

原文無題,題為編輯所擬