立場新聞 Stand News

我的 2019 香港抗爭代表

2019/12/31 — 20:55

立場新聞圖片

立場新聞圖片

早兩日「民間記者會」進行民意調查、年度回顧,要選香港 2019 年十大事件、三大最具代表性人物。睇番個 list,一幕幕怵目驚心嘅場面即刻出番嚟,越睇越想喊,想像唔到香港人幾點樣捱過呢幾個月,更加難揀嘅係得三位嘅代表人物。喺呢場運動入面,可以令香港走到今日,每個角色、每個人、每個崗位都係缺一不可,唔知點揀。諗咗好耐之後,最終揀咗三個:

1. 周梓樂同學

周梓樂同學唔係呢場運動入面犧牲嘅唯一一人,亦唔係第一人,不過佢係呢場運動入面第一個有名有姓咁直接因為警暴而犧牲的手足。佢嘅離去結下與暴政永不能解嘅血債,呢筆血債喺真相大白、公義得以彰顯前永不能解。周梓樂同學嘅犧牲凝聚咗香港人嘅抗爭鬥志,永不敢忘。

廣告

2. 梁繼平

廣告

幾前年的《香港民族論》編者之一,今年 7.1 喺立法會內除下口罩、宣讀宣言,其後流亡海外。梁繼平代表嘅係與政權正式決裂的勇氣,及新一代的政治論述,「宣言」正正維繫同定義咗「香港人」呢個民族。7.1 嗰陣好多人仲質疑點解要衝擊無人開會嘅立法會大樓,係咪「鬼」;幾個月後,先至發現與暴政妥協同與虎謀皮何其愚蠢,梁繼平嘅精神同勇氣走在眾人之前。

71佔領立法會

71佔領立法會

3. 攬炒巴團隊

多番眾籌,海外登報,促成美國議員到港觀察,將香港帶上國際舞台,成為 2019 年的世界焦點,更將香港式抗爭輸出國際,其創意、行動力、執行力令全世界刮目相看。香港人嘅能力絕非港共政權可比擬,港府嘅「維港式」海外廣告相比之下,只係東施效顰。攬炒巴團隊代表嘅係香港人能夠立足於世嘅能力,香港嘅國際觀同能力係唔需要背靠強國先可以生存。

其實仲有好多好多角色代表咗香港人抗爭嘅意識形態,好似屠龍小隊、走在危險最前端嘅香港記者等等。2019 年香港人經過苦難覺醒嘅一年,2020 年係繼往開來,毋忘初心,繼續寫下香港歷史嘅一年。

發表意見