立場新聞 Stand News

打完「小報告」然後又「憑着愛」,玩乜?

2020/2/26 — 9:56

林鄭月娥FB 影片截圖

林鄭月娥FB 影片截圖

林鄭月娥·⋯哈,點講好呢?…有時覺得佢都真係「幾得」!咪捉錯用神,唔係話佢好掂,係話佢都唔係完全冇可塑性!之前佢咁鬼巴閉,叻成咁,但到了今時今日,佢就唔怕肉酸,唔怕核凸,乜嘢低莊嘢都做得出!

不久之前寫份報告俾北京,就連一直與政府同一鼻孔出氣的建制奴隸派都俾佢篤背脊,向阿爺投訴佢哋對特首,即係佢自己,作「人身攻擊」;行政會議成員都只係「差強人意」;至於罷工醫護、批評政府嘅人全部都係借機會鬧事嘅分子,係以反送中運動嘅同一策略來干擾政府施政;甚至話已經下達命令要醫管局追究罷工嘅組織者。總之就係要強硬到底,就係要同香港人作對,就要當全港市民都係佢嘅敵人!

但到今日,佢又寫咗篇文,似乎想面向香港人,交代一下政府嘅抗疫措施係幾咁有效,政府嘅部署係幾咁有系統喎!最頂癮嘅係佢竟然最後話要「憑着愛」!我睇多咗兩次,真係冇睇錯,佢真係講「憑着愛」!佢竟然夠膽同香港人講個「愛」字!其實佢憑乜?

廣告

我淨係記得過去幾個月佢點樣縱容啲黑警胡作非為,仲額外使多香港人超過10億,俾啲黑警揼人!仲無端端多咗好多浮屍!啱啱今晚先睇到另一個報道,講到公務員復工,有傳佢想堅持連口罩都唔俾,仲話公務員返工戴口罩就等於佢哋返工要着衫,意思係點解要政府俾!口口聲聲叫人團結抗疫,但係對公務員可以咁苛刻,對香港人可以咁惡毒,但倒轉頭,佢又講「愛」!

佢竟然真係係篇文度講「憑着愛」!翻睇咗兩次,令我打咗十次冷震!我聯想到陶三姑、陳立品或者馬蹄露係鏡頭面前搔首弄姿,向大家講解點樣保持身段窈窕!我又幻想八兩金或者吳孟達喺紅館開口水蘇,教大家點樣保持形象英偉,解釋自己點解可以幾十年來都比發哥同偉仔更有型!

廣告

「憑着愛」呢啲說話係林鄭月娥講嘅咩?佢有乜資格講?啱啱先至公布咗最新嘅民調,佢嘅支持度得單位數,破咗香港社會有記錄以來領導人得分嘅新低!呢條數仲未計佢那份小報告曝光之後嘅影響!

不過諗返轉頭,又見怪不怪。林鄭月娥自 high 都唔係第一次。未做特首已經話自己「好有為」,又話自己「好叻做政策」,又話自己「好熟政府運作」,又話自己「做嘢比較有效率」!總之最巴閉就係佢啦!所以佢唔鬼理大家反對,話點就點,想點就要點,大家反對佢,佢就搵黑警學成蟲做警察,示威就扑穿你個頭,採訪就噴到你一面胡椒。然後向北京打大家嘅小報告,倒轉頭又同大家講「憑著愛」。呢啲咁嘅人竟然可以做特首,去到咁嘅民望水平可以繼續做特首,足以證明香港而家個制度有幾荒謬。

一天前我才講過,如果有一個「唔係A貨」嘅「一國兩制港人治港」,香港人點會選擇一個咁嘅人辦做香港社會嘅領導人?係共產黨先至咁有眼光!係中共嗰種制度,係呢啲咁嘅所謂威權體制,先至會專搵奴才扮領導!係要搞到一國兩制唔湯唔水,先至可以令林鄭呢類人有運行!

林鄭月娥立了心要吃疫症的人血饅頭,但各方面嘅事實已經足以證明,佢已經沒有翻盤的能力。思歪衰極仲有少數涼粉,林鄭會剩返啲乜?正所謂「狼奸尚可食涼粉,鵝衰有誰撐㐂婆」。佢嘅處境已經係一行出街就必然會俾人用粗口歡迎,要靠幾十個黑警圍住先至夠膽曝光!佢兩個仔可能有排都唔敢再返香港!佢做埋咁多dirty 嘢,將來就算俾佢勉強做到尾,佢落任之後可能都係邊度都唔駛去,好可能只能夠匿埋喺北京,接受共產黨嘅愛護!

而且,一份據說由佢親自撰寫,交俾北京嘅報告,過到手嘅人應該唔多,但竟然漏咗出街,仲要交咗去肥佬黎嘅蘋果,呢個玩法其實說明咗好多微言大義。諗得冇咁嚴重,可能係佢身邊有啲人都想佢死。諗得嚴重啲,可能根本就係一個局。中聯辦換咗人,港澳辦換咗人,跟住而家就要佈個局令佢收皮。仲可能要玩到盡,令北京慳返唔諗點安置佢好!做特首做到咁神憎鬼厭,搞到北京雞毛鴨血,唔通真係又要跟規矩,俾個有名無實嘅國家領導佢養老?嘩,點知佢會唔會又搞另一個大頭佛出嚟!我就睇得悲觀啲,唔係,係樂觀啲,份抗疫報告咁樣曝光,肯定有啲嘢!特首辦到依家都唔敢回應,林鄭月娥幾日唔敢見記者,今晩又突然間會講「憑着愛」,其實都係場戲仲有得睇落去嘅跡象。大家何妨在搶廁紙,或者排隊買口罩嘅過程中順手買定D花生!

作者 Facebook

發表意見