人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/2/24 - 20:12

控制唔到疫情,就控制人民思想

越嚟越多專家話,武漢肺炎應該唔會控制得到。要接受佢會長時間同人類共存了。

醫學進步,不久嘅將來,有效嘅藥物同疫苗,相信亦應該會研發到出嚟。到時呢隻 virus 就唔會好似今日咁得人驚了。

問題係,喺成功研發到藥物,同疫情繼續不能控制嘅呢段空窗期,點算?時間唔長的話,大家就好似現在咁樣生活一段日子,咬緊牙關捱過佢就算。但咩叫做時間唔長?每個國家,對這段時間嘅容忍程度都會唔一樣。底子厚嘅可能可以頂耐啲。外強中乾嗰啲,可能唔頂得好耐。

廣告

當確認經濟頂唔住但疫情又唔受控嘅時候,會做嘅,或許就只剩低嗰啲相對「可控」嘅東西。乜嘢係可控?相對於病毒,人民嘅思想係可控。市民嘅恐懼係可控。

政府會話俾你聽,我哋之前錯判了。隻病毒並唔係想像中咁可怕。你睇,死得幾少人?我哋之前嘅措施,係因為作為負責任嘅政府,並且多年前經歷過 xx 疫情,為咗保護同愛護廣大人民而做。但隨著我哋現在對今次嘅疫情有更多嘅掌握,對呢隻病毒有更透徹嘅認識,我哋確信可以將之前嘅措施解除。商業機構可以復工,學校可以復課,被封的城鎮可以解封。生活可以全面回復正常……

有輕微徵狀嘅市民,大可以不必就醫,因為只要你有正常人嘅免疫力,就無須擔心。至於重症病人,反正你九成都唔係老就係長期病,醫唔醫都分別不大,是否還要到醫院求醫,就請自行決定吧。

為免浪費過多人力物力,由 x 月 x 日起,政府會停止發放確診和死亡數字,避免給一小撮別有用心的人士利用去製造和散播對國家不利的謠言。

跟住……就冇哂事啦!疫情完結啦!

對於未來幾個月會發生咩事,我唔係玄學大師,更加唔識加持口罩,我完全冇能力預測得到。我嘅估算,都係極粗略地基於 (1) 專家話疫情短期內搞唔掂;(2) 經濟不能死;(3) 四週圍陸續話解封;(4) 領導人話防疫措施太激烈;(5) 明明八成人醫極唔好但吹哂風話疫情開始受控……

所以我大膽斷估,這次嘅疫情,應該不久之後就會「突然」消失,一切都會「回復正常」。

我呢亭廢中,縱使是賤命一條死不足惜,但卻比較命硬。我的家裡面,有老人家也有長期病患,倘若疫情真的「突然」消失,其實才是我最怕最恐懼的狀況。

 

(標題為編輯所擬)

作者 Facebook