假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/1/4 - 22:56

換人唔等於換路線ㅤ但奶共權貴隨時兩邊都係死

2018 年 12 月,特首林鄭月娥於禮賓府與駱惠寧會面。(資料圖片,來源:政府新聞處)

2018 年 12 月,特首林鄭月娥於禮賓府與駱惠寧會面。(資料圖片,來源:政府新聞處)

可能要再講多少少。《立場》轉載我文章後有人留言唔好跟車太貼,咁快開心,但我其實全篇文冇一句話我開心喎。

我只係寫話,駱惠寧主要會緊跟中央路線,而行溫和定強硬路線係未定,因為決定權在中央吖嘛。換人唔等於換路線,777 替 689 咪係冇換路線囉。老實講,以習到目前的風格,行溫和路線的機會不大。

咁我講權貴有難又係點呢,同行強硬路線冇衝突㗎喎。其實一路有個講法係中央有一部分人認為香港民怨咁深,矛盾咁深層次,係源於政策太傾斜權貴,應該要改,只係港苦同西環同權貴行得太埋改唔到。所以依家派個同香港權貴冇挐掕的人來可能係要加強應對依個問題。

廣告

但留意,依個講法係完全唔代表會比香港更多民主自由。

所以權貴有難,意思係你以為奶共有著數,但中共隨時可以放棄你哋,反正錢依家中共大把,以國企同紅資取代港資絕對做得到。而同時外國制裁的可能性正在增加,奶共權貴隨時兩邊都係死。所以精嘅就應該好似超人咁,快啲停止奶共,咁就至少唔洗怕外國制裁嗰一邊先。

最後再提提,舊年 8 月中聯辦亦有次人事調動,曾經長期在福建 — 即習的權力核心 — 工作,2017 年先來中聯辦加入港澳工作的陳冬,獲升做首席副主任。所以安插依個駱惠寧係習要安插自己人,係好大可能。

 

(標題為編輯所擬)

作者 Facebook