立場新聞 Stand News

撤換王志民揭示「一國兩制」完全崩壞

2020/1/6 — 22:09

中聯辦主任駱惠寧

中聯辦主任駱惠寧

今個週末最震撼嘅新聞莫過於中聯辦主任王志民被免職由前山西黨委書記年屆六十五歲嘅半退休人士駱惠寧空降接任。突如其來嘅新聞證實咗月前路透社指出中央會撤換王志民的消息並非如虛構,各個評論員、網媒、KOL 都有自己嘅一套評論、分析、推演,推敲撤換中聯辦主任對中共嘅意義,對港嘅政策方針轉趨強硬抑或懷柔,從駱惠寧嘅履歷、年紀、倉促調任中聯辦主任見微知著,推敲聖意。

呢啲評論好多真知灼見,非認識中共手法嘅評論員講唔出呢啲論述,不過我哋要問嘅係由幾時開始我哋會咁關心中央官員嘅任免升降?

「中央人民政府駐香港特別行政區聯絡辦公室」簡稱「中聯辦」本身的職能僅為一聯絡角色,作為北京同香港之間的溝通橋樑,聯絡在港官方機構,包括外交部及解放軍等基本法下港府職權以外的部門,但近十幾年來,將一句「承辦中央人民政府交辦的其他事項」無限擴大,影響力無遠弗屆,直接干預香港事務。

廣告

中英聯合聲明嘅承諾「一國兩制」、「港人治港」、「高度自治」,《基本法》寫明除外交及國防外,其餘事務皆屬香港特別行政區管轄範圍,中央及其他省市機構不可干涉。

基本法第十六條
香港特別行政區享有行政管理權,依照本法的有關規定自行處理香港特別行政區的行政事務。

基本法第二十二條
中央人民政府所屬各部門、各省、自治區、直轄市均不得干預香港特別行政區根據本法自行管理的事務。

廣告

2019 年六月到宜家的一場騷亂,堪稱香港歷史以來最大嘅政治危機,問責制下,特首以下,官員、司局長問責全數不用問責,何以一個聯絡辦公室嘅主任要問責下台?點解區議會選舉建制派大敗會問責於中聯辦主任?從幾時開始香港所有選舉操盤都係由中聯辦負責?民選議員敗選,要問責嘅竟然唔係政黨主席、領導層,而係中央聯絡辦事處,試問香港嘅民主係為誰發聲?議員代表嘅係民意定係北京嘅聲音?

中聯辦(資料圖片)

中聯辦(資料圖片)

從「河水不犯井水」到「香港管治第二團隊」

冰封三尺,非一日之寒,從特首選舉後當選特首率先向西環拜謝;從中聯辦會高調向建制派訓示;從有建制侯選人被威迫利誘勸退參選;從民選議員會被冠以「西環契仔」、「契女」而不作掩飾,更不以為恥……多年嚟中聯辦嘅影響力與日俱增,港人無奈接受,更視之為常態。淨係睇有幾多人講得出姜恩柱、高祀仁(首兩任中聯辦主任),有幾多人識張曉明、王志民就知中聯辦嘅角色係廿二年嚟改變有幾大。

中聯辦多年來在港屯地,組建利益集團,盤根錯節;高調操縱選舉,種票、配票手法越趨明顯;操控傳媒,電視媒體、網媒、紙媒全面成為中共喉舌;以至去年逃犯條例修訂,高調召見民選議員,要求歸邊,威迫利誘商界噤聲,相繼登報支持逃犯條例修訂。全面明目張膽、理所當然地干涉香港事務。中聯辦儼然成為香港嘅太上皇,第二個權力核心。

最可怕嘅係,大部份香港人已經習慣咗呢種中西環共治嘅模式,由「河水不犯井水」,係廿二年來進化至「成為香港第二管治團隊」,對「一國兩制」、「港人治港」嘅踐踏已經變得麻木,習非成是。從換人嘅消息掀起嘅波瀾就知道中聯辦主任嘅重要性對港人嚟講絕不下於特首,這反應絕非香港之福。

中聯辦換人嘅最大啟示係認清「一國兩制」的虛妄,認清制度上的殘缺,認清「港人治港」的謊言。「光復香港」最根本性嘅理念就係要回復番真正嘅「自治」,政府施政、議員決策係以香港人的福祉為依歸,而唔係習慣仰望中央鼻息,等待中共永遠藏在黑暗的政治鬥爭結果。

發表意見