人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/1/28 - 14:33

政府將香港推往疫區之路?

Step 1:拒絕封閉香港關口
Step 2:強調香港醫療資源無上限
Step 3:實施措施讓所有武肺患者留港醫病費用全免,而且冇本地人優先

憑住以上幾樣特區政府喺呢幾日做過嘅事,可以得出點樣嘅推論?我唯一諗到,而且相當明顯嘅,係政府非常期望吸引更多,甚至大量非港人嘅武漢肺炎患者,以及疑似患者來港免費就醫。

香港正朝向疫區之路進發。而且係百份百人為、刻意地把這個城市推往這個方向行。

廣告

唔知那些處於收成期的人覺得如何?吸引大批武肺患者「來港消費」是否重大商機?黨和特區政府英明,諗到呢條好橋可以振興本港疲弱嘅零售市道?

那些認為班後生嘅唔好搞咁多嘢,只要順從權威就有好日子過嘅阿叔,唔知現在又係咪覺得喺特區政府英明領導下感到份外安全?只要你聽聽話話,政府就會幫你遮風擋雨,擋住班帶菌嘅病患入侵你嘅家園?

✽ㅤ✽ㅤ✽

比較一下 03 年同 20 年,未來嘅幾個月,香港會唔會比當年「幸運」一啲,還是更差?

可能會幸運一啲嘅原因,係
1) 經過上次沙士,香港人嘅防疫意識係強咗的;
2) 上次爆發源頭係廣東省,同香港之間嘅往來更密切。今次喺湖北,香港人有個湖北嘅老婆或者二奶嘅機會,應該少過廣東省啩……

至於差啲嘅原因……
1) 隻 virus 本身傳染力勁過上次,而且冇乜 symptoms,防不勝防;
2) 香港醫療資源比 03 年更緊絀,仲要人口多咗;
3) 香港人防疫意識冇錯係強咗,但 17 年嚟多咗幾多唔係香港人落咗嚟居住?
4) 上次爆鑊嗰陣,都仲未有自由行呀……
5) 對上嗰次,政府有冇依家咁趴街咁廢先?當年仲係買錯㗎車要問責落台嘅年代呀。

當然可能仲有更多,但個人睇法而言,5 比 2,好難唔悲觀的。

我係極極極希望我估錯。

 

(標題為編輯所擬)

作者 Facebook