立場新聞 Stand News

政治全面陷落,香港永無希望

2021/2/23 — 23:03

資料圖片,來源:Anthony Intraversato @ Unsplash

資料圖片,來源:Anthony Intraversato @ Unsplash

黃絲唔係人人都係好人,也唔係個個都能幹,有啲都幾低能,係無可否認嘅事實。同理,新一批區議員也會一樣,但呢年幾嘅觀察,好明顯嘅一點係,絕大部份區議員都後生有魄力,肯做肯搏,真心為社區,唔係諗住分豬肉攞着數。你見到佢哋好勤力落區,好勤力去睇 cases,敢於犧牲,隨時被拉被鎖在所不惜,而且佢哋普遍能力也比輸咗嗰批保皇派高很多。

唔好睇政見,咁你寧願要呢啲「廢青」區議員,定係一班日日唔見人、剩係定時定候派嘢、尸位素餐嘅廢佬政棍?

更重要係,選呢批區議員嘅人,都有自由意志,唔係聽主人吹哨而行動,所以邊個當選後偷懶、做低能嘢、呃選民走數等,一定有人發起懲處,佢哋一定會承擔後果,唔單止不能連任,仲隨時身敗名裂。簡單嚟講,佢哋係有真正嘅民意監察和權力制衡。但那些保皇派呢?無論幾廢,無論出幾多次醜,無論街坊幾憎佢哋,以前已經好難趕走,依家直頭冇對手唔使走,日日痴痴呆呆都可以人工照袋,議席照攞。

廣告

所以,香港係唔會有任何復活的希望,也沒有未來。因為肯做肯搏真心為社會嘅,全部係年輕人,亦全部成為黑五類,佢哋永遠唔會入到主流政治,唔好講政府或立法會,就連權力咁小嘅區議會,都被趕盡殺絕。然後剩返嘅,就係一大班廢柴再入局,而因為已無任何競爭,呢啲廢柴會永廢下去,那些極少部分可能還想服務社群嘅後生仔,入到去都一定會腐化成廢物。

咁你話我聽,香港未來會有咩希望?

廣告

 

作者 Facebook

發表意見