立場新聞 Stand News

教育局打開新文革第一槍,歷史真相永遠係極權死穴

2020/5/15 — 15:40

毛澤東在「長征」途中(網絡圖片)

毛澤東在「長征」途中(網絡圖片)

DSE 嘅歷史科題目激起另一次政治風波,就一條讓考生評論「1900 至 1945 年間日本對中國帶來利多於弊」嘅開放式問題,教育局深夜發聲明措詞嚴厲,強力譴責考評局當局要公開交代,並指「嚴重傷害日本侵華戰爭中受莫大苦難的國民的感情和尊嚴」;其後群魔亂舞,建制派、黨媒大公報、北京五毛群起而攻之,將一條本身無乜人留意嘅 DSE 歷史科試題炒成熱話。

日本發起二戰,侵略中國及東亞等地區,呢段歷史係不爭嘅事實,所有考生都耳熟能詳,根本唔需要再提供資料。資料性題目嘅目的就係要提供一啲考生較少接觸嘅歷史背景,透過分析、思考從正反兩面去討論一個本身已經被廣泛定性嘅話題,究竟有無爭議性同討論性,結論則任由考生發揮。咁嘅前提之下,有咩偏頗可言?

即使淨係睇兩份資料,一者指黃興向日方求援,經濟援助以助革命事業,一者指出日方借款嘅條件,其實考生可以討論日方藉借款以鐵礦作抵押,就好似宜家中共透過向「一帶一路」國家借貸從而掌控當地嘅經濟命脈,借款本身已經具有爭議性可作正反論述,並唔係左派五毛所言扭曲歷史,立場偏頗。正面面對歷史係一個國家一個民族向前走嘅必然過程,考評局提出嘅只要係真實而非杜撰出嚟嘅史料,點解唔可以作為考試嘅一部份?

廣告

再講,條問題係問「1900 年至 1945 年間,日本為中國帶來的利多於弊」。1900 至 1911 年係滿清嘅中國,1912 年至 1945 年係中華民國嘅中國,日本侵華係 1937 年至 1945 年,敢問教育局長楊潤雄「傷害國民的感情和尊嚴」傷害嘅係中華民國嘅國民定係中華人民共和國嘅國民?幾時輪到港共官員為中華民國國民抱不平?

如果考評局下次嘅歷史科試題係提供:(一)鄧小平提倡改革開放,九十年代後中國經濟起飛,三十年嚟成為世界第二大經濟體;(二)1989 年 6 月4 日鄧小平下令武力鎮壓天安門學生,釀成屠城血案。再問「鄧小平主政對中國利多於弊,你同唔同意呢個講法?」咁係咪就可以接受?咁係咪就唔偏頗?唔會傷害國家民族感情?問「文化大革命利多於弊」、「共產主義利多於弊」又得唔得?係咪好公允持平?

廣告

歷史從來都係有正反兩面,再具爭議嘅歷史人物都有功過評價,讀歷史就係要了解正反兩面嘅史觀再作出客觀嘅評論。即使慈禧作為獨裁者都有其功過可論:廢科舉、行新政、建鐵路、辦女學,呢啲都係佢嘅「功」;再講,若果無慈禧嘅攬權自重,滿清喪權辱國,又點會孕育出孫中山嘅革命意志,推翻帝制?功、過、利、弊基於客觀歷史陳述,但係是否「功不抵過」,「利多於弊」先係價值判斷。

所以今次問題核心根本唔係日本對中國係咪利多於弊,問題只在於中共一不尊重歷史,二不理會事實,三不容許獨立思考。喺佢哋嘅思考模式,中共永遠正大光明,絕對正確,容不下半點瑕疵雜音,所有批評都係抹黑,所有缺點都係杜撰,所有質疑都會上升到傷害十四億人民嘅感情層面。相反,只要被中共視為最大矛盾,就絕對邪惡,都係「亡我之心不死」,沒有半點值得同情或欣賞嘅地方。「中華民族主義偉大復興」呢一面新文化大革命嘅旗幟,利用呢種化繁為簡嘅價值判斷二分法,操控一班頭腦簡單、民智未開嘅愚民,激化敵我矛盾,鞏護極權統治。二元分法嘅黨國宣傳,喺呢面十四億人嘅旗幟之下,容不下香港教育嘅獨立思考、批判精神。

真相同歷史永遠都係暴政最懼怕、最視之為洪水猛獸嘅大敵,所以先要窮盡黨國之力去扭曲真相,重寫歷史,更容不得「中國自古以來領土嘅一部份」嘅香港官方考試帶有「反動」思想。通識科訓練學生有獨立思考能力,歷史科教學生以史為鑑、反省自身嘅能力,呢種獨立思想模式正正係林奠口中要處理嘅「無掩雞籠」,要從教育箝制新一代嘅思維,中共隻手早就透過全面馴服嘅港共官員伸到全港每一個範疇。

事實上,人嘅思想無邊無際,無任何方式或者法律能夠劃地為牢;除非人民自己屈服於強權之下,自我閹割,設下思想禁區,否則任誰都唔能夠殺掉思想、信念。香港人用繁體字、講廣東話,學貫中西,通曉外語,更加應該積極作為真正傳承中華文化嘅一群,要將中共最懼怕嘅「歷史的正文」傳承落去。當年科技咁落後都阻止唔到思想解放,今時今日進入大資訊年代,要完全箝制思想傳播更加係不可能嘅事。

最後,如果要答呢條問題,我會首先定義題目中嘅「中國」指嘅係「中華民國」定係「中華人民共和國」:喺「一個中國」嘅大原則底下,作為考生,有理由相信考評局所擬嘅題目嘅「中國」係指當時尚未立國嘅「中華人民共和國」。喺呢個定義之下,呢段時間日本對「中國」當然係「利多於弊」。如果無當年日本侵華,以毛澤東為首嘅共產黨早就被蔣介石成功清黨,「二萬五千里長征」逃至陜北苟延殘喘,差啲就全軍覆沒;如果無日本侵華,就唔會引發西安事變,蔣介石亦都唔會放棄「先安內後攘外」嘅國策,致使中共有喘息之機,二戰後成功竊國,直接導致至今中共成為全球最大極權體制,箝制人民思想,荼毒全球生靈;無日本侵華,就無毛澤東 1949 年君臨天安門嘅開國大典,所以毛澤東先至要多番感激日本對「中國」嘅貢獻。唔知咁樣作答,呢條 DSE 值幾多分呢?

發表意見