立場新聞 Stand News

教育與啟蒙

2020/5/23 — 10:24

最近教育局局長楊潤雄同一眾投共派議員,頻頻就一條中學文憑試嘅歷史科試題護主,楊潤雄更表示該題目因為傷害人民感情,而應該取消評分,但係對於教育評議會主席何漢權公開批評毛澤東,唔知局長又有無批評佢傷害十三億人民感情呢?噚日(22 日)終於決定取消成條題目,一系列嘅政治操作實在令人譁然。

首先單單對學生而言,突然取消該題目已經是無理取鬧。考試作答要時間,思考亦要時間,當然對於楊潤雄等人呢種媚共先於思考嘅高官,呢個結果就相當合理。

廣告

仲記得響 2014 年佔領中環運動前後,港共一直對於通識科必修課程 — 今日香港中嘅「政治與社會參與」一部份頻頻提出修訂甚至希望取消。有人覺得政治「好高深」,唔應該出現響學校。簡單啲講,即係唔想學生知太多社會嘅醜陋同黑暗,將佢地培訓成一隻「快樂的豬」好比做一個「痛苦的人」,因為人嘅意志係會作出反抗,對抗不公義。

學校,從來都係學生啟蒙嘅其中一個地方,獲得知識嘅泉源,批判嘅思考。由歷史到普世價值,傳承人類嘅智慧同思想嘅重要地方。但呢加港共嘅介入,令學術自主蕩然無存。老師言論受限,下一代思想受控。今次嘅歷史科事件先例一開,未來嘅打壓可以幻想只會更加嚴重。

廣告

獨裁政權最怕嘅係懂得思考嘅人民,真相永遠都係令獨裁政權最不安嘅武器,唯有教育,先可以將真相傳承,公義永遠保留。歷史係由勝利者所寫,我地要永遠保持智慧去對抗敵人,香港人寧可選擇做一個「痛苦但有思考的人」亦絕不會做一隻「快樂而無知的豬」。

願香港能再次重光。

作者製圖

作者製圖

 

作者 Facebook

發表意見