立場新聞 Stand News

明日大嶼終極地圖解鎖

2020/7/16 — 10:13

兩件事:今星期五政府會偷襲向立法會拎 5.5 億擱置咗成年嘅人工島工程研究撥款,加埋近日中央全速研究借桂山島嘅計劃,成個香港終極地圖迷霧就基本上已完全解鎖。

話說近月提出借個桂山島俾你起公屋,聽落都覺得好唔 make sense,因為桂山島個位風高浪急,缺水缺電,市區搭高速船都要成近一個鐘,孤島上面起公屋俾 10 萬人住形同規劃自殺,貌似純粹滿足一種帝國自 high 嘅低檔次地理想像。

然後近日建制規劃界、《文匯報》同民建聯都開始吹風話可搬走埋香港個碼頭。原來講下講下,變咗係想食咗香港個碼頭去珠海再騰空葵涌啲地起樓,先至係潛台詞。

廣告

呢個「重置碼頭方案」似曾相識,重記得林鄭喺 2018-19 年自編自導嘅土地大辯論裡面,突然空穴來風殺出兩個選項係叫「重置葵青貨櫃碼頭」同「發展葵青貨櫃碼頭上蓋」,嗰陣好多行家都搲爆頭唔知邊個嘅主意。

如果根據番近年頻頻北上嘅前規劃署長凌嘉勤近日嘅講法,話自己 2018 年已曾在內地學術會議提到桂山島填海初議,亦即係承認咗個搬碼頭去桂山島個原意,一早喺大陸已經成形,只係香港人被規劃咗蒙在鼓裡,俾人塞咗入自己把口都唔知。

廣告

再睇番嗰陣董伯伯個「團結香港基金」,嗰陣提出新玫瑰園計劃填逾 2,000 公頃人工島,亦都講到明建議「長洲以南」重置碼頭同棕地,只不過冇講清楚其實可以南到去邊,隨後林鄭立即未諮詢完就 all-in 明日大嶼。依家睇番,即係好可能佢地一早收到風要在港推銷定個計劃,卒之到今日真係放咗入去明日大嶼 5.5 億個工程研究撥款,會研究埋「長洲以南」嘅長遠發展。

醒少少,借個島俾你搬走個葵涌貨櫃碼頭,即係話定俾你聽好有可能會有額外幾千億基建道路網連起哂啲珠海外島同香港,唔係啲貨點再經陸路運到市區?

正路嚟講,估計佢地諗緊嘅係一整個大灣區港珠島嶼橋網,坐底會有港珠澳駁落桂山島,到人工島建成後就駁埋條橋落附近啲外島。其實根本都唔知目前海洋地質起唔起到,不過你會搵到 19 年年底珠海已經開波去桂山島做定地質海洋調查,起到分分鐘又係另一個上萬億超支開庫大計,到時邊個最開心?

同埋香港連個碼頭產業都落入咗珠海境內,所有貨物進出清關都分分鐘俾人操控埋,雖然話香港已經冇咗自治地位,未來將會再死多兩錢重。

所以萬億人工島點解咁多人反對,係因為佢一定係嗰唔只萬億嘅無底深潭中途站。島嶼上以智慧乜乜之名嘅監控基建、水電路橋高鐵、工程超支、人禍災難嘅隱藏成本,香港港官一齊死幾世都賠唔起,虧啲經濟佬、地產佬同啲學者重作文咁作啲唔同理由盲撐人工島,以上嘅成本提都唔敢提,重喺度推銷有助解決房屋問題云云。

咁計落,其實最驚都唔係反正預咗一無所有嘅年青人,而係成千上萬靠政府養老金嘅退休/等退休嘅公務員,睇住依家政府毫無制約嘅財政紀律,點計都計唔到條數,分分鐘都俾人提早拎走埋。

對好多已經歷過咁多嘅香港人嚟講,其實萬億財政一鋪清袋同碼頭送中已經開始有啲無感,背後順便搞埋中港人口融合亦都可以預想,成件事好似已經太  logical。但仍然會令我覺得討厭嘅,係有班人可以當香港任何一片地方都好似白紙一張,目空一切鍾意點劃就點劃,重愈劃愈過分,然後重包裝話係份大禮送俾你,基本上破壞哂成個大嶼山南部嘅本土勝景同自然風貌之餘,為咗佢地嘅意志同利益,將我地好 L 鍾意嘅香港變咗個嘔心惡俗之地。

搭飛機望到香港周圍島不成島嘅畫面,諗起都覺得傷心,一諗到咁就好想不如俾啲掙扎,一齊贏番啲錢分咗佢就最好。

作者 Facebook

發表意見