立場新聞 Stand News

【時局分析】胡亂反覆號召舊模式活動,只會固步自封

2020/10/4 — 12:55

立場新聞資料圖片

立場新聞資料圖片

【文:戰術研究學會】

十一已經過去,今次想同大家傾下而家成場運動嘅局勢。

兩部分,先講下而家場運動面對既問題,再拋磚引玉諗下有咩新招可以出

廣告

長話短說,睇左圖先:

廣告

 

(圖片來源:〈月 9 日遊行後的事(一):社會運動的週期危機〉- 楊政賢, 原圖來自 Ayni Institute,楊政賢作中文翻譯。

呢張圖係上年運動早期出現,而家我地已經步入左最後兩個階段。

無可否認,今年嘅抗爭已經大不如前,無論街頭勇武抗爭,定係和理非式文宣,都已經買少見少。但係講緊嘅唔單止係動員力、戰鬥力等等,仲有創造力

先係到而家列出而家面對緊嘅三大問題,再續一解釋

  1. 缺乏創意
  2. 缺乏戰意
  3. 錯判形勢

------------

  1. 缺乏創意

如果大家仲記得,係上年高峰期果幾個月,我地係不斷諗到新抗爭手段,差唔多個個星期都係玩緊唔同野,亦都因此令香港人憑創意揚威海外。

但到左今年,我地已經再冇新招,每次嘅號召都只係玩到爛嘅遊行集會,唱歌SHOPPING。適應/進化唔單止係講緊抗爭者,亦係講緊政權一方,當抗爭者冇新嘅手段,狗隊自然可以每次都憑過往經驗應對,一次比一次輕鬆

但點解會有咁嘅問題,就請你睇埋第二同第三個問題

至於點解決,係第二部分我會拋磚引玉試下引發返大家對抗爭嘅想像力

  1. 缺乏戰意

戰意唔單止係講緊有幾想贏,亦都係講緊有幾想打。我地成日聽人講「唔會打冇勝算嘅仗」,就係講緊對勝利嘅想像係會影響到對戰鬥嘅動力。

好多人都認為,自從理大一役之後,街頭勇武抗爭就陷入左樽頸。武力差距越黎越大,彷彿就好似勝算越黎越細咁,佢地會認為如果贏唔到,就不如諗下點樣保住條命好過,好過出去「送頭」。久而久之,當政權全方位進行打壓,佢地就選擇全方位保命,「唔打就唔會輸」。

呢種想法唔能夠話完全錯誤,但有一個致命嘅問題,就係將勝利同武力劃上等號

咁係因為大家冇諗清楚武力係呢場運動中實際嘅角色係咩。於是導致一個二分出現:失去戰意嘅就視運動已死唔再做野;尚有戰意嘅就留戀武力,成日幻想吹大雞出去打一場就會贏。

結果就係不斷有人嘗試號召街頭抗爭,形式亦都同以往無別,就係因為大家都有個希望可以好似上年咁打返個江山返黎。

但現實係點,其實大家心裹有數,我亦都有係舊文分析過街頭抗爭嘅樽頸係邊

希望大家睇一睇,重新思考武力嘅定位:

【街頭策略|集思廣益】A:「你唔出係咪當手足 condom?」B:「吓,你出係咪想送頭??」- 分享自 LIHKG 討論區

  1. 錯判形勢

街頭抗爭嘅形勢,係上述嘅舊文已經有分析過。

我用一句概括:

街頭抗爭本來就係此消彼長,而家實力已經減少到冇辦法再觸碰對方既底線,更莫講話打贏對家。

但除咗街頭抗爭嘅形勢,仲有群眾心理嘅形勢。適應期唔單止係適應打壓,仲好可能係習慣打壓。

當打壓持續,好容易會出現嘅情況就係民眾開始習慣種種打壓,每日都發生,只要冇咩新野都覺得冇咩特別,冇特別就唔會特登出黎反抗。

換句話說,就係動員會越黎越困難,因為越黎越難挑動民心。當動員難度變高,但動員方式不變甚至退化,只會有一個可能:就係動員失敗。

回想上年69我地嘅文宣係用左幾耐去做,民陣係提早幾多入紙;

再睇下最近嘅十一,連入紙都只係行動前兩三日先入,更莫講其他宣傳。

呢年嘅唔少行動都有同樣嘅問題,如果硬係要話「冇諗過會咁少人」云云,然後周圍鬧人港豬垃圾唔值得救,恐怕只係自欺欺人,好聽講就係錯判形勢

咁點先可以返去上年咁?如果係講街頭抗爭,恐怕要等下一個運動週期,即係好似一開始果張圖咁,蘊釀下一波嚴重事件,然後一口氣爆發。呢段時間可能好長,甚至最悲觀可能會係永遠。

但係請謹記咁唔代表呢段時間冇其他野可以做,街頭抗爭同其他抗爭手段從來都唔係二元對立。

例如成日見人將上前線同食黃店黎比較,完全係為鬧而鬧,係前線手足會罷食黃店定係食完黃店唔上得前線?會上前線嘅食完黃店都係會上,唔會上前線嘅都唔會因為食左黃店而走上前線,兩樣野近乎係冇關係

-----------

「講咁多咪又係想鬧手足,分化」

為免誤會,我都澄清返以上種種問題都唔係只係歸因於手足,而係我想指出一D我地可以改善嘅因素。政權全方位打壓、狗隊無限買裝等等固然都係導致呢D問題嘅因素之一,但並非我地可以改變,既然改變唔到佢地,就嘗試改變自己,而有好多時我地思考嘅惰性都會限制左我地對成場抗爭嘅想像。

「錦鯉有咩高見?」

接住落黎我都會嘗試拋磚引玉,不過我自問都冇咩創意,所以都自覺唔會係咩高見。但旨在勾返起大家嘅創造力,我一個諗唔到,就靠大家一齊諗。

------------

係拋磚之前都仲會有一個小問題想講,希望大家可以花多少少時間睇埋落去。

無論係抗爭嘅高峰期定係今年開始疲弱,我地討論行動目標時都總會提到「畫面要靚」,要做俾人睇。但係好多時我地都會有個錯覺就係,「做咩都會有人睇」

不過現實其實係,畫面唔單止係取決「你做D咩」,更重要嘅係「人地影D咩」

我係上面引述嘅舊文都有提到一點:「唔新鮮,姐係唔JUICY。唔JUICY,媒體就唔會報導」

今年我地都有好幾次大型行動,都不外乎遊行集會。得到嘅畫面自然都係警暴嘅畫面居多,但係引得起關注嘅畫面已經唔再係咩圍捕、扑爆頭,而係打大肚婆、打細路呢D比較新鮮嘅畫面,國際關注嘅亦都一樣

換句話說,如果要有效地繼續抗爭,最緊要「新」,呢個就好考大家嘅創意,如果我地可以好似上年咁諗到咁多花樣,得到嘅關注自然都會好似上年咁一次比一次多

------------

進入第二部分,我隨便拋磚引玉,希望大家擺脫懷舊MODE,唔好將抗爭形式變到例行公事咁:

  1. 和你戒嚴

大時大節你周圍放狗,搞到出街都有罪咁,咁就成全你,一齊留係屋企,全日唔出街,大時大節成條街得返班狗係到戒嚴咁,影出黎個畫面仲唔靚死?

仲要手足們唔洗驚俾人拉,坐係屋企就可以光復香港,今鋪你點同我玩

  1. 和你收鋪

以國慶為例,紅日間間鋪頭都落閘,你要威要型,我就要你好似經濟大蕭條咁,旅遊之都呀拿

仲要紅日,手足冇藉口做少日生意啦

  1. 和你晾(唔係我諗,之前係其他地方見到)

成棟樓都晾黑衫,影出黎張相幾壯觀,個畫面靚到

晾衫又唔犯法,手足又贏

呢D都係隨便拋出黎,但係如果你有認真諗,其實所謂畫面靚,要嘅基本上就係多人做,如果夠多人做,一齊唔做野已經可以係做左野,只要事前事後俾返個名義佢,而唔需要下下用到被捕師做祭品

但係問題係要點號召到咁多人做,呢樣野就好考大家嘅創意。特別係而家大部分人都以自保為先,鍾意走精面,咁嘅情況下仲不停號召以前大家捨身搏鬥嘅活動或者不停互鬧,只會固步自封,倒不如諗下有咩方法可以吸引到呢班人再幫手。

希望呢篇文可以重新擴闊大家嘅想像。

我一個人諗唔到嘅野,我相信大家一齊思考就會諗到。

保持思考,我地會贏。

黎明終會來臨。

(作者簡介:致力研究抗爭戰術。「戰術唔單止係用黎應付對手,更係用黎反省自己。」)

發表意見