立場新聞 Stand News

有線少咗條線 好快變無綫

2020/8/22 — 14:40

【文:前大台記者】

繼早前突然撤換新聞部管理層之後有線新聞昨天即時解僱三名工程部開台「元老」,三人包括工程部主管由開台至今服務有線新聞逾廿年,三人昨日突然齊齊「收大信封」,即時辭退。

一般觀眾可能唔知道,以為電視台外出採訪只得記者加 camman,其實仲有最可靠嘅工程,攝影+採訪+訊號係三體一位,電視新聞中不可分割嘅組合。尤其是大型示威和突發,減少工程人手,猶如斷記者左臂,咁你會話咁你仲有右臂吖?啱嘅,咁我講個例子你聽:七警當晚夜深,所有記者早已交更,留返 camman 同 link 在外面,令到七警毆打曾健超嘅信號,直接駁返電視台。

廣告

有咗工程呢個好幫手,令到當晚嘅畫面可以即時出街。在審判七警刑事法庭上,法官更加需要傳召工程部主管,並信納電視台嘅系統能在毫無合理疑點下,不被干擾直接將現場畫面出街,唔信返去睇份判詞。

雖然近年科技進步,電視台減省咗人手,變相令攝影師做多一份,用一個叫 TVU 嘅裝置將現場畫面傳送。昔日 Cable 嘅工程部尤其是海外或內地採訪,一向都是最疊馬,好多時行家都十分羨慕,但近年人手已漸漸減少。無論本港示威,內地突發都能最快最新,呢啲先係香港市民最需要嘅真相。依家邱達昌入主嘅 Cable,再任命 TVB 和亞視前人把關,未坐暖張椅子就手起刀落炒工程部,實際上是陰乾電視台,將  Cable 變成 ATVBB 嘅第一步。

廣告

解決了由有線開台服務至今嘅元老,下面嘅工程大哥就唔再敢出聲,要低聲下氣做人,日後大型示威突發,或再上演亡城如中大理大之役,新老總一句話唔夠人手唔需要開 link,咁 Cable 就一夜間等於 CCTVB,奈何記者攝影採訪到幾多猛料,都插翼難飛,因為已無咗我哋最強嘅後援幫手,將最重要嘅片段傳送。

呢一招同大台花哥不斷陰乾工程部,減少工程人手嘅手段如出一轍。大台記者出外突發,九成時間都一對人兩對手,點解唔願意為了重要新聞派多一個人?就是為了節省一間酒店房錢? 還是一個人嘅開飯費?

新聞有價,你 subscribe 有線新聞嘅月費,是包埋工程大哥份糧。有線少咗條線,就好快變成無綫。

發表意見