立場新聞 Stand News

有關人大常委正式審議國安法

2020/6/19 — 13:32

一、雖然國安法越快通過,可能會擴大取消參選人資格嘅規模。不過政府要取消參選人資格,一向都有大量莫須有嘅罪名,即使有定冇國安法,佢哋要取消候選人嘅參選資格,其實都會羅織到啲千奇百怪不知所謂嘅原因。

二、港區國安法,從頭到尾都係針對香港嘅抗爭者,而唔係針對外國人。若然見到草案行文修改咗用字,就幻想惡法只係針對外籍人士,其實未免過分樂觀;無論字眼點寫,「勾結」定「干預」,根本上政府就係要報復,去年香港抗爭者成功爭取國際盟友反對逃犯條例,促成北京完全撤回惡法。

三、我唔認為北京會就所謂勾結外國或者境外勢力嘅行為作任何明確規定。根本佢只想以言入罪,究竟點樣定義乜嘢叫做勾結?連去完英國養傷返港後更加愛國愛黨嘅律政司司長鄭若驊都話,暫時難以就「勾結」字眼作恰當回應,要要有具體法律內容先可以評論,即係連政府都變相承認,佢地都覺得目前嘅法律根本都相當空泛,憑空吹水得個講字。

廣告

四、關於國際連結工作,其實不論民主派、保皇黨、香港政府定中共,坦白講形式都係演說、聽證、游說、會面,當然大家內容同主張就肯定好唔同。大家去外國,都係見世界各地嘅官員、議員、幕僚、學者,同埋公民社會人士。政府或者保皇黨去到外國,當然會做北京應聲蟲,係咁叫外國政府支持港區國安法,咁咪有好似北韓伊朗嗰啲國家做啦啦隊支持,我地咪叫外國政治人物反對港區國安法。

五、問題在於,北京再一次鉅細無遺咁樣證明,乜嘢叫做「只許州官放火不許百姓點燈」,突顯點解國安法根本就係以言入罪嘅文字獄。明明大家做嘅嘢都係一樣,區議會有公帑可以比議員喺任期裏面去外國交流,立法會又有既定海外議會聯絡小組,係同各國議員有聯絡,而家就偏偏係民主派就唔做得。但無論係點,香港眾志都會繼續爭取國際社會反對國安法。

廣告

 

作者 Facebook

發表意見