立場新聞 Stand News

期望見到大家對攬炒個發言有更多討論,而唔係照單全收

2020/5/14 — 17:39

立場新聞圖片

立場新聞圖片

【文:物理系裝備撚】

諗咗好耐出唔出呢篇文,因為要評論被造神嘅攬炒巴嘅發言,應該會引嚟唔少批評。

首先我講明前設先,我深信今次發言主要係唔想泛民本土再分化,後半嘅運動方向係拋磚引玉,希望一石激起千重浪,咁我就唔客氣加入做其中一浪。

廣告

坦白講,我覺得今次攬炒巴係有啲脫離政治現實同離地嘅,以下會講下我個人睇法:

一:姊妹城市不切實際

廣告

首先,要同一個城巿簽訂協議,你首先要有一個接頭人(a representative body),而區議會即使授權攬炒團隊去做民間外交,其實係民主社會睇嚟並冇足夠認受性(legitimacy)。即使好彩簽到姊妹城市,目的都只係增加文化交流,喺經濟上民間外交無力簽下任何貿易協議,對運動冇實質益處。而且,好多巿長都會見風使舵,必要時不惜解除友好關係。

二:區議會外交欠缺民意授權(mandate)

由區議會做外交存在隱憂,區議會本身範疇就係區政,即使係一人一票選出嘅議員,喺外國政客眼中,民意授權未大到可以代表全香港,呢個亦係點解外國議員比較鍾意見立法會議員嘅原因。好可惜嘅係,非泛民之流要入到立法會實在太困難(對於我嚟講眾志都係泛民)。

三:自己選舉自己搞嘅願景可以放大啲同時間線上早啲

上面兩點已經解釋咗現有體制行外交嘅困難,一直以嚟無論老泛民、攬炒團隊、抑或 IAD 做緊嘅都只係遊說(lobbying)而並非外交,因為外交係會有權力作出雙邊協議嘅。

一直以嚟斷斷續續都有人提過「影子政府」,先撇開可行性問題,事實上一個完全架空特區政府嘅影子政府先有可能做到外交,如果要自己搞選舉,就應該選埋一個內閣(cabinet)出嚟,先有資格去同人做外交。當然,呢件事實行喺上嚟好難,我亦只係拋個方向出嚟。

四:「和勇合一」有名無實

承上,如果要有自己嘅民意授權代表去出外談判,佢第一件事應該會俾人暗殺(甚至明殺),所以呢個影子政府係必須有一定武裝勢力。好遺憾地,攬炒巴呢個短中長期計劃完全冇討論過勇武嘅定位。所謂和勇合一,唔應該再停留喺「不分化不割蓆」嘅程度,而係要進化去到行動互相配合嘅地步。假如真係做到影子政府,勇武嘅角色就唔只街頭抗爭,而係應該起到一個保護呢個內閣,同埋警告中共港共如果夠膽郁呢班人,必有可怕後果嘅作用。

(作者簡介:一個沉迷於研究、改裝、以及實測裝備嘅物理撚,偶爾會亂噏下時政)

發表意見