立場新聞 Stand News

林鄭交出 0.024% 惡劣成績,仲有邊個撐得落?

2021/1/5 — 15:32

作者製圖

作者製圖

我想請問每一位支持過港府推行強制檢測嘅專家們,0.024% 檢測陽性,係咪一個理想嘅篩查(screening)成績?見到港府推行嘅強制檢測成效如此不堪,仲點樣支持港府繼續無限擴充權力、以抗疫為名增加愈嚟愈多唔合比例嘅強制措施?


政府專家們談論公共衛生政策時候,好鍾意講「科學」、講「我唔識政治」,荒謬地忘記公共衛生本身就係政治,「唔識政治」但作出評論,只會一錯再錯,錯到做咗個 0.024% 嘅成績出嚟。

失敗在於,專家們忘記呢個政府係廢到不堪、做乜都錯,無能力制定恰當嘅政策,辨認真正「高危群組」,只有 0.024% 陽性嘅地方,佢都列入強制檢疫範圍。今日林鄭講完呢個數出嚟,仲可以厚顏無恥話「證明亦都係有用嘅」,堅持強推呢個成效不堪嘅政策,唔考慮作出調整:一幢大廈,十四日內,只要有兩個個案就要全幢迫驗,係咪有必要去到咁盡呢?林鄭唔會因為 0.024% 咁差嘅成績去反思,因為呢個政府就係如此冥頑不靈。

廣告

或者,林鄭堅持用呢個不合比例嘅超嚴格手段去「抗疫」,不過係「項莊舞劍,意在沛公」。


抗疫一年,香港人生活已經大受打擊,我地愈發意識到唔可以為抗疫賠上一切。戴口罩、勤洗手固然要做,但過份極端嘅政策,只會令香港人精神崩潰,亦不見得真係有效。就如,大廈強制檢測,乙明邨居民突發被封鎖喺大廈內,行動不便嘅獨居長者都要辛苦去到帳幕檢測,又有大量居民突然有家歸不得,加埋安排混亂,大把居民苦等檢測結果良久。箇中不便,換嚟 0.024% 嘅成績,係香港人想要見到㗎咩?

廣告

香港人喺呢一年盡顯公民質素,口罩洗手社交距離樣樣都做好,換嚟疫情相對受控。而家好不容易,確診個案回復不過四十宗一日,巿民日盼夜盼生活可以早日回復正常,政府就不停放風,又要限制家中聚會,又要派「紀律部隊」追縱「密切接觸者嘅密切接觸者」。

然後,真正重要嘅嘢,政府永遠唔做。台灣嘅成功,香港唔去學。上年香港曾經多個月冇本地確診,醫護巿民要求封關,政府話係「極端政治勒索」,結果病毒再次傳入,一直纏繞大家至今。

類似嘅嘢,呢一年嚟我寫咗好多次,寫到自己都唔想再寫。只係今日出現 0.024% 呢個咁可笑嘅實證,容許我再一次,去勸說比仲會支持政府「抗疫」嘅人知道,係時候醒了。

If you allow the government to break the law during an emergency, they will creat an emergency to break the law.

 

作者 Facebook

發表意見