立場新聞 Stand News

林鄭應該參考許志安嘅道歉記者會

2019/6/18 — 17:36

6月18日 林鄭月娥記者會

6月18日 林鄭月娥記者會

睇完林鄭6月18日最新嘅「親身道歉」記者會,我懷疑佢身邊嘅人係玩X佢。咦!又話佢會「鞠躬」同埋「正式撤回」嘅?有樣嘢叫做「期望管理」,例如以前政府成日先放風話財政預算案財赤,點知最尾有盈餘派錢,市民就會覺得有「驚喜」收貨。但今次林鄭身邊嘅人預先放風話林鄭會「鞠躬」、「正式撤回」,完全係違反「期望管理」原則,只會令市民失望,激起更多民憤,所以一係林鄭臨尾轉咗軚,又或者林鄭從未打算鞠躬撤回,只佢身邊嘅人想同佢切割、間接玩X佢。

關於唔肯講「撤回」嘅問題,好可能係林鄭戰鬥格上腦、死要面,逃犯條例修訂已經停止咗立法工作、冇時間表,基於政治現實,今年下年都有區議會立法會選舉,估計林鄭喺2020年7月立法會會期結束前都唔會再推,所以某程度上佢都真係「撤回」咗,但林鄭偏偏唔肯講「撤回」兩個字,好明顯係唔想向示威群眾認低威、妥協,唔想示威群眾有「贏」嘅感覺,因為如果示威群眾「贏咗」,就代表自己「輸咗」,好無威信。

撤回條例:無
不作檢控:無
撤銷暴動:無
追究警方:無
林鄭下台:無

廣告

喺今日記招上面,林鄭基本上無滿足過示威群眾呢五個訴求,又錯過咗一個挽回民意嘅機會。如果時光可以倒流,佢應該參考許志安今年4月16日嘅道歉記者會,一開波就先鞠躬道歉,然後聲淚俱下自責,講返句「我係一個壞咗嘅特首…」「我覺得自己好錯、好討厭、好丟臉、好噁心、好陌生」狂罵自己,然後喊喊喊……或者能夠挽回一些民意。

二次創作道歉發言稿:

廣告

「今日記者會嘅目的係,我真係好想親口、衷心向大家講聲對唔住。
我要為200萬上街嘅市民、特別係因為612集會而受傷同被捕嘅人士、墮樓男子嘅家人、所有香港人,致上萬二分歉意,因為我自己做咗一件不可原諒嘅事。
而呢個錯,讓我深深去反思自己,
所以今天我喺呢度,係想承擔我嘅責任。
我嗰排的確工作壓力好大、唔夠瞓,但呢個絕對唔係定性暴動、開槍、開催淚彈嘅藉口。
我非常後悔,我知道冇得潛水,
我好難面對自己,接受唔到自己。
睇到報導之後,我覺得自己好錯、好討厭、好丟臉、好噁心、好陌生。
我有深刻地反思自己點解會去犯這個錯誤
定性錯咗做暴動
我覺得而家應該承擔後果
我會分兩個部分
第一個部分
我會暫停我所有工作
直到搵到一個真正嘅自己
重新去檢視自己
第二個部分係喺我心靈上面
我覺得我自己不知所云
因為我嘅行為 我嘅錯誤
令身邊所有愛我嘅人
承受這樣嘅壓力同痛苦
我希望接下來嘅日子裡
所有被我弄痛傷害的人
都可以好好
呢個事件讓我反思嘅一點
我最錯嘅地方係失去我自己
我最後向所有愛我嘅人講一句對唔住
對唔住讓你們難堪
我做錯咗
也對唔住香港人
我唔知道該點樣走自己嘅路
我喺呢一刻
係冇咗靈魂嘅人
我係一個壞咗嘅特首
期望大家可以比時間我搵返我自己
我向大家講聲對唔住。」

發表意見