立場新聞 Stand News

林鄭政府姓「賴」是常識吧!

2019/12/16 — 22:26

羅致光(資料圖片)

羅致光(資料圖片)

區選大敗,葉劉賴三賴四,被建制派的周梁及田北俊一唱一和,笑她是「面皮最厚的議員」。其實講面皮厚、喜歡賴地硬,本來就是林鄭政府的施政特色和強項。

好似葉劉自己,同時是行會成員,乃政府最高權力機關之代表。當日盲撐林鄭,種下近乎亡黨的果;而妳之所以有本事、有資源搞到個黨出來威威,說穿了,也是因為中央發功支持。做得傀儡,不面向有良知、明事理的選民,就食得咸魚抵得渴,咁都仲要賴,就只說明妳的水平和眼界好低。

不過,又唔止葉劉呢類庸才,就算 IQ 高達 160,一樣可以唔知個「醜」和「衰」字點寫,淨係識賴和卸膊。講嘅係勞福局局長羅致光。

廣告

羅局長一向自詡對數字敏感,喜歡分析,但咁又點,本身涼薄,無同情心,玩數字咪玩出個「六十歲都是中年」的謬論出來囉,終於一鳴驚人。呢個在佢做官之前已經係咁,佢有套講了 N 年的獅子山精神做理論根據㗎,鼓吹自食其力,政府只會授之以漁。所以,由昔日做民主派大腦反對最低工資,到配合林鄭推動社福界深痛惡絕的一筆過撥款,到年初要懲罰不努力(找)工作的長者(詳情可參考筆者〈被「罰」的應該是羅致光、張建宗〉)刻薄得來好貫徹始終。亦因為同聲同氣,林鄭才會招攬佢入局吧。

俗語謂「痴痴呆呆,坐埋一枱」,有時唔到妳/你唔信。就算個人聰明,都可以變蠢。羅局長今日又再向公眾示範。其實,羅局長不止對長者,對年輕人都一樣不懷好意。去年在網誌佢就批評過年輕一代時常懷緬一些他們沒有經歷的過去。所以今日佢再發表「偉論」,一點唔奇。

廣告

佢話很多年青人喜歡「裸辭」,「我不喜歡,我就走了」,轉工而致零收入的時間較長,做調查時,便令貧窮率的情況上升。佢都知道是現時社會的經濟結構有問題,但佢這樣說,明眼人都知佢想把矛頭指向年輕人「裸辭」,暗裡埋怨佢地欠缺耐性、好逸惡勞。但難道羅局長無眼睇的嗎?過去半年,年輕人如何不怕犧牲、不計較得失地為公義、為信念而戰,不就是說明佢眼中那個練精學懶的年輕人刻板形象,根本與現實脫節。只要有意義,莫說人工低,就算付出再大,佢地都全力去拚。年輕人就算裸辭,很大程度是因為工作本身機械重複、人工低而沒挑戰性,更要無前途,無良好福利,如果捱到老,搞到一身傷病,仲唔駛旨意政府會提供足夠保障,你死你賤!

而呢個無良心、劫貧濟富、專益老 seafood,永遠借「自由市場經濟」招牌去自圓其說的畸形社會/經濟結構,是哪些人搞出來的?這個深層次矛盾的一大源頭,林鄭政府有嘗試過去變改嗎?

賴,仲要賴到幾時?

 

作者 Facebook

發表意見