立場新聞 Stand News

林鄭病發的四個癥狀

2020/2/4 — 18:53

由逃犯條例修訂到防疫,越來越多證據顯示林鄭有病,又或者林鄭本身就係一種病,只係醫學界未記載,坊間稱之為官狀病毒,但更貼切的名號可能是:與民為敵好打得症候群。

病癥一:自尊心大過常識

香港出現死亡個案,林鄭居然掉轉頭,鼓勵人唔戴口罩,慳啲駛,正正是用一個更大的錯誤去掩飾之前錯誤的經典例子。

廣告

政府無能,市民想防疫都無罩用,林鄭夠膽死叫下屬盡可能咪戴罩,當武漢肺炎係流料,真係要幾痴線至諗得出咁嘅防疫招數:既然避免感染咁難,倒不如等多啲人中招,中咗招嘅人就唔駛再提心吊膽啦,就好似啲人怕死,咁有乜方法唔駛再怕呢?死咗佢咪得囉,死屍係唔會怕死嘛!

林鄭呢種保護自尊心的方法其實噚日(2 月 3 日)已見端倪。佢宣布增加封閉關口數目時,在記者會上就無戴口罩。抗疫都要鬥氣、逞強,跌落地揦拃沙,簡直極品!

廣告

病癥二:無邏輯可言

記者會上,林鄭的態度不是急市民所急,而是擺出戰鬥格,向醫護挑釁,話極端手段唔會得逞。諷刺係,佢出來見人,係要宣布收緊入境管制,雖非全盤接受市民共識,無全面封關,但多少回應緊罷工行動。換言之,前言後語的邏輯根本不通。如依佢所講,以林鄭的極端性格,跨境港人的利益咁重要,重要過香港人的生命安全,咁係應該所有關口都不封至係。而家兩頭唔到岸,仲衰過當初暫緩,為乜呢?香港一定要做中國權貴階級的逃生門?

病癥三:自以為是到震

醫學權威黎青龍教授接受傳媒訪問,直指林鄭曲解世衛意思,世衛根本無講過唔可以封關。黎教授支持封關,是因為唔想政府在情況變得一發不可收拾時才採取行動。但林鄭一向硬頸過人,佢話一就一,話二就二,學者專家都唔放眼內,連防範勝於治療呢套都可以唔信。周永新教授就是佢最出名的受害者。唔係話學者專家一定啱,但不同意佢地,就應該拎出實淨的反駁理據,而非一言堂,用不成理由的理由打發人家。施政不基於知識,有幾反智,有幾容易帶來災難,看看六十年代的中國便知。

病癥四:攬炒性衝動

唔好睇林鄭幾十歲人,佢其實和後生仔女一樣,非常血氣方剛,啲血好易上腦,而佢衝動起來,真係好得人驚㗎!

逃犯條例修訂時已經係咁,當時筆者就評論過,林鄭有責任向習近平力陳利害,撤回方案,這對習本人來說都利大於弊。之後都係歷史,林鄭至今亦都無汲取教訓,仲變本加厲。唔封關,香港爆大鑊,難道對習近平很有利?本係連建制派都無反對咁做,林鄭為何仍死撐呢?

唔通佢唔止想同香港人,甚至要同習總攬炒?

 

作者 Facebook

發表意見