立場新聞 Stand News

林鄭超額完成了什麼?

2020/7/18 — 18:42

《超額完成》

尚存氣息被扶靈,水源待鑿說渠成。
棚瓜未熟先蒂落,雲英待嫁已偷情。
三年作盡千載孽,半任摧殘一世名。
事事無成猶未了,超額無能罪滿盈。

今天最荒謬的笑話,是林鄭月娥竟然說她當年出來競逐特首那份政綱已經超額完成。真係竇娥咁悲如果翻生都會忍唔住笑。

她上任頭一年半根本乜都做唔成。三隧分流又搞唔掂,最終要收回,還要是因為她的盟友建制派都唔支持佢。

廣告

房屋政策只是在原先那一層「資助置業階梯」分割成更多層次,花樣似乎是多了,又拉埋市建局及港鐵落水,但仍然是塘水滾塘魚,因為整體供應沒有增加。而將資助自置物業分成幾個層次,只是架床疊屋,其間的關係又沒有搞清楚,不同的轉售限制也未見邏輯,根本都只係半桶水,不能說是完成,也不能說是什麼重大的政策成就。而且,因為把出租公屋全部變成「綠置居」,輪候資助出租公屋的時間不但沒有縮短,還要不斷延長,距離三年上樓的政策目標越來越遠。劏房問題根本未解決過。高高舉起的「社會房屋」計劃,到今天仍然是進度緩慢,跟當初的的目標仍然有很大的距離。至於空置稅,講一輪終於都係冇做。咁叫做超額完成?醜唔醜啊!

教育算是撥出了額外 50 億,令纏繞教育界多年的合約教師的問題慢慢舒緩,但教育積存下來的很多問題,差不多完全未解決過,還要讓她那一位教育局長不斷在為學校製造新的問題。通識科就由小問題搞到變咗大問題;初中修讀中史科本應唔係大問題,但隨着她的施政失誤,就有更多人擔心會變成係問題。因為要表忠,因為要擦鞋,因為要政治正確,好多明明唔係問題嘅就搞到變成問題,原本冇問題嘅就搞到出咗問題。咁叫做超額完成?

廣告

醫療更加唔在講,根本就冇做過啲乜!去年四月開始的自願醫保計劃,根本就唔係佢搞,只不過係佢任內正式推動。而且自願醫保根本不能解決醫療融資的困難,所以只是聊勝於無,應該要做嘅嘢仲有好多。但佢似乎乜都冇做。醫館局員工繼續不斷超時工作,各種服務依然長時間輪候,每年兩三次的流感高峰期總係要搞到病人係急症室等下幾個鐘頭才可以上到病房。咁都可以叫超額完成?

如果講到社會福利服務,佢更加可以說是應該感到羞恥。她上任之初就已經說會接納幾年前安老事務委員會作出的「安老服務程序計劃」檢討報告,又話會接納相關建議,但到而家乜都未做過!那份報告書似乎仍然在氈飯煲!至於扶貧也是一事無成,去年就連扶貧高峰會都要取消,貧窮人口仍然係百幾萬!私營安老院繼續不斷有醜聞、社區支援服務仍然依舊要輪候長時間。其他各種服務也沒有突破性的發展,老問題仍然係問題,最叻就只係話延長產假,除此之外仲有乜?真係諗唔到!咁又叫超額完成!

佢超額完成嘅,就係撕裂社會。搞到過去一年紛爭不斷。佢另一個超額完成嘅,係令警察完全染黑,再無懸念。佢再有一個超額完成,就係令一國兩制死得。佢任內就連講咗多年嘅垃圾徵費都要收翻。佢做到民望長期負 40 幾分以下,做到有 50% 嘅市民俾零分佢,但仍然可以繼續個個月𢭃幾拾萬,繼續喺度作威作福,繼續喺度藐咀藐舌,搞到咁大鑊,仍然可以做足三年都冇事,呢個就真係超額完成啦!

如果一個正常嘅社會,佢早就應該落台。講大話,講空話,講廢話,講埋啲鬥爭語言,這幾方面,他也可以說是超額完成!做人做到咁無恥咁下流,更可以說是犯賤爆曬燈!

 

作者 Facebook

發表意見