立場新聞 Stand News

「校園攻防戰」係咩玩法?

2019/11/12 — 23:19

我覺得唔使諗到咁複雜,其實好簡單嘅!中大校長段崇智早輪出咗封信譴責警察濫用暴力,令到啲曱甴黑警好唔潤。所以借呢次機會,要攻入中大。其實可能就係咁簡單,駛乜理由?警賊做嘢要講理由嘅咩。

況且,曱甴黑警其實好小氣。宵小情懷,係咁上下。而家有槍喺手,有棍喺手,又有奶媽包庇,梗係玩到佢盡。打完年輕人,又打孕婦,完全唔理後果,因為唔需要理後果,亦都知道唔會有後果。做埋啲衰嘢可以冇後果,你話幾過癮呢!真係怕咩做多幾次!這就是紀律部隊失去紀律的必然結果。

點解紀律部隊會冇哂紀律,因為林鄭月娥話唔會出賣警隊,因為警隊的管理層根本唔知紀律部隊係咩意思,淨係知道有槍有棍,又有水炮車裝甲車,就以為做乜都得!法庭判埋罪,七警要坐監,一哥仍然拒絕道歉;法庭判咗某差佬非法殺死個的士司機,警務處長一於當乜事都冇發生過。上行下效,警察仲駛乜講紀律,仲駛乜守法,仲駛乜理警務條例?

廣告

呢兩日玩大學校園攻防戰,究竟係咩玩法!仲要大量放催淚彈?要驅散邊個?大學校園就梗係多後生仔㗎啦,梗係多大學生㗎啦!點解要去大學驅散大學生?仲要響宿舍大放催淚彈放題喎!乜催淚彈咁用嘅咩?唔係好荒謬咩?如果真係要驅散嘅,首先係本來就唔屬於嗰度嘅曱甴警察。佢哋有咩資格入大學校園?有資格就唔使淪為曱甴警察啦!

警謊發言人昨日話「大學唔可以成為罪犯嘅避風塘」,講嗰陣時好似好有型。其實市民看在眼裏,大家都知道,依家變咗係「警署成為了罪犯嘅避風塘」!香港有三萬幾個暴徒,就係喺警署這一種曱甴竇滋生出嚟嘅!佢哋出勤時帶住個頭盔,孭埋個豬嘴,矇住對眼,有時淨係見到對耳仔同兩個窿,仲有手手腳腳綁住嗰套架生,似足曱甴嘅 exo-skeleton,淨係個 look 都足以說明佢哋先配得上「曱甴」呢個尊稱啦!再睇埋佢啲行為,更加唔使拗啦!

廣告

面對呢兩日咁大規模嘅曱甴警賊壓境事件,我覺得中大及城大嘅管理層及教職員,冇理由當冇事。只得少數幾位有擔當嘅教職員出嚟與警賊爭論?中大有幾多個教職員?中大啲管理層去哂邊?中大啲校董呢?

喺理工大學,尚有一位民選出嚟嘅學生校董代表,夠膽企出嚟,佢卒之俾警賊裝到打咗鑊,但始終都叫有個人出嚟站下台呀!而且,佢作為校董會嘅一員比黑警打,我覺得其他校董會嘅成員冇理由唔出聲。特別係與江湖人物同枱食過飯嘅流丙蟑校董,係咪應該試吓搵來自上海或者來自橫洲幾位江湖大佬傾傾,睇吓可以點擺平!若果幾位叔父肯出手,照計曱甴黑警都會畀返幾分薄面,因為據知曱甴黑警同江湖人物交情唔錯,近呢幾個月佢哋更加合作無間添!7.21 更可以話係佢哋合作嘅高峰,穿崩得幾好睇呀!仲啟發咗 8.31 黑警喺太子站打完就走嘅成功行動!

今日冇再進攻理大,只集中火力進攻城大同中大,唔知係咪同呢個人脈背景有關。如果係,就更加證明大學管理層,特別係城大及中大嘅管理層,真係要盡快撥正返亂。反正近幾年大學教育嘅發展都已經十分墮落,應該一於去盡啲。越墮落就越快樂,搵多幾個有江湖背境,或者出嚟講句說話個款都似江湖大佬多過臭老九,個名又充滿咗隱喻嘅李蟈蟑之流入管理層。咁有好多事就好易傾,唔會搞到啲畫面咁肉酸。搞到成間大學烽煙處處,始終有礙呼吸!香港仲唔夠 suffocating 咩!

 

作者 Facebook

發表意見