立場新聞 Stand News

梁君彥欽點內會選舉主持,係徹頭徹尾越權違法

2020/5/15 — 13:40

梁君彥(資料圖片)

梁君彥(資料圖片)

梁君彥引述英國御用大律師嘅法律意見,引用《議事規則》第 92 條賦予俾立法會主席嘅權力,欽點陳健波為下星期一內會選舉主持

《議事規則》92 條:

議事規則未有規定的程序

對於本議事規則內未有作出規定的事宜,立法會所須遵循的方式及程序由立法會主席決定;如立法會主席認為適合,可參照其他立法機關的慣例及程序處理。」

廣告

換句話講,92 條賦予俾立法會主席嘅權力唔係無邊無際、無窮無盡,佢可以決定嘅方式及程序僅限於「議事規則未有作出規定的事宜」。

《內務守則》附錄 IV 「選舉委員會主席及副主席的程序」已經明確寫咗選舉內會主席嘅程序:

廣告

「就內務委員會及事務委員會而言 —

(a) 如選舉在立法會每屆任期的內務委員會或事務委員會首次會議上舉行,出席委員中排名最先者須主持選舉。如他獲提名候選主席一職,在未獲提名的出席委員中排名最先者須主持選舉;

(b) 在其他任何一次的主席選舉中,在選舉前擔任內務委員會或事務委員會主席的委員須主持選舉。如他缺席或獲提名候選該職位,在選舉前擔任內務委員會或事務委員會副主席的委員須主持選舉。如該兩名在選舉前擔任正副主席的委員均缺席或獲提名候選該職位,出席的其他委員中排名最先者須主持選舉。如他獲提名候選該職位,在未獲提名的出席委員中排名最先者須主持選舉。」

即係話,郭榮鏗作為現任內會副主席而無被提名嘅情況下,係擁有合法作為內會主席選舉主持人嘅權力,即使佢未能履行主持人嘅權力或者缺席,都係依次由最資深嘅在席議員,即係涂謹申、梁耀忠代行主持人角色,而唔係唔知邊到爆出嚟嘅陳健波。

如果立法會主席今日有權罔顧《議事規則》及《內務守則》欽點任何一個佢屬意嘅議員作為主持人選舉主席,並罔顧程序公義,禁止在席議員質疑程序提出任何規程問題,咁佢點解唔用 92 條因為佢認為李慧琼適合,直接欽點李慧琼做內會主席?係咪可以因為自己適合所以直接欽點自己做永久主席?

再者,平時唔係好憎「外國勢力指手劃腳,干涉香港內部事務」?點解去到呢啲關頭要引用「英國御用大律師」嘅法律意見為自己越權行為撐腰壯膽?係咪戀殖嘅行為?定係容許外國勢力干預香港嘅事務?

今次梁君彥嘅行為已經超越咗「釋法」,係徹頭徹尾嘅越權違法 Ultra Vires,議會抗爭嘅成果唔係要單純期望政府會屈服於民意妥協,而係透過不斷嘅施壓迫使港共政權進一步犯錯,進一步撕毁一國兩制,梁君彥之舉正正就係內會抗爭迫出嚟嘅後果。下一步泛民議員應該向法院提請司法覆核,挑戰梁君彥嘅決定違法違憲,並申請法庭臨時禁制令阻止陳健波下星期一主持內會選舉,使法庭作出裁決,向世界展露香港所謂「司法獨立」嘅真相。

發表意見