立場新聞 Stand News

極權政府下的災難

2020/1/23 — 15:16

2020 年 1 月 22 日,香港終告失守,一日內確診兩宗「武漢肺炎」個案,喺疫情威脅籠罩全港之下,睇下我哋嘅港共政府做緊乜: 

  1. 林奠自己飛咗去瑞士,忙住同唔同嘅傳媒做訪問,仲喺到做緊公關 show,意氣風發咁同啲外媒講我唔會辭職,一國兩制運行良好,繼續抹黑示威者,半句都無關心過疫情; 
  2. 實際香港最高領導人 PK 鄧就繼續出席荃灣區議會做公關 show,舌戰群雄,宣揚佢嘅「正義」; 
  3. 張建宗同一眾高官見記者時即使瘋狂咳,仍堅拒戴口罩;同時禁蒙面法司法覆核繼續上訴;
  4. 食衛局局長陳肇恥連同衛生署出嚟講「高度懷疑」個案,繼續拒絕封關,拒絕關閉高鐵;連最溫和嘅「自願性健康申報」到今日都只係「積極考慮」,武漢封城後,無人可以出入,先至扮哂停售武漢到香港嘅高鐵飛
  5. 運輸署公佈春節連續七日小型客車免港珠澳大橋來回收費
  6. 食環署喺維園年宵打壓社民連檔口,迫令拆去佈置; 
  7. 環保署派人放蛇,票控維園年宵「黃色花店」無徵收膠袋費罰款二千; 
  8. 黨鐵推出春節優惠,由年廿九到年初九憑兒童八達通可免費兼無限次經羅湖、落馬洲火車站來往港九新界,擺明有助中國旅客一家大細細遊香港。

港大防控中心總監何栢良教授都忍唔住爆港共政府宜家嘅防疫措施連 03 年都不如,一心諗住棄守,無諗過防止疫症傳入,第一時間準備兩個渡假營等社區爆發嗰陣作觀察隔離之用,佢哋嘅管治意志就係大開中門等疫症入侵,做法連北韓都不如。「政治清算」、全方位打壓異己、「止暴制亂」永遠係最優先:食環署、環保署唔做好清潔衛生去做政治打手,運輸署、黨鐵唔做好人流監控,反而引清兵入關,呢個就係我哋嘅港共政府。

原因好簡單,極權政府服務嘅唔係人民,而係佢自己嘅「老細」,權力授權嚟自北京,而唔係香港市民。所以有咩事第一樣諗係點樣「please」佢哋嘅老細:阿爺要隱瞞嗰陣就幫手隱瞞,阿爺話要封城先扮停賣高鐵飛,之前半句都唔敢郁高鐵站。佢哋最關心嘅只係自己嘅權位,即使再多嘅市民死,只要遏止得住暴亂、奉承得阿爺好,就可以永遠坐喺到唔走,好有「管治意志」咁繼續帶領全香港攬炒。

廣告

一個政府無任何制衡,無任何監察之下,係完全可以無視民生民意民情,呢幾個月我哋睇得多,見得透:二百萬人上街震耳欲聾嘅聲音都可以聽唔到;咁多條鐵證如山嘅片都可以話「我睇唔到,我唔知,無發生」;721 警黑勾結昭然若揭可以唔查、唔理、唔認……咁點解班藍絲自己嘅身家性命受到威脅嘅時候,會期望呢個港共政權會為咗香港人民嘅健康同福祉企起身同中央對抗,以保護香港人優先呢? 

啲「中立 L」、藍絲成日覺得「民主」離自己好遠,即使無自由、無人權、無民主都唔緊要,只要三餐溫飽,繼續返工搵錢,去旅行食大餐,買樓上車,就可以一心一意平穩做港豬,你爭取民主你嘅事,千祈唔好影響到我返工。宜家疫情災難喺眼前,咪知道無民主嘅極權政府係完全唔需要理民生,為咗維穩,今日可以拉哂啲宣揚有疫情嘅人「造謠生事」,十日後就可以封城由得你哋自生自滅。

廣告

民主同民生其實係互為一體,無民主嘅極權政府,災難之下,賤民什麼都不是。香港人,自求多福,保護自己,光復香港,在此一疫。

發表意見