人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/5/3 - 12:06

歐美政府有幾衰你知唔知?! 給大中華愛國阿叔輩:我們都知豬扒堆中邊件特別醜

credit: Alan Santos/PR, https://bit.ly/2zSUyL4, CC BY 2.0

credit: Alan Santos/PR, https://bit.ly/2zSUyL4, CC BY 2.0

早幾年,親戚朋友間都仲會喺吹水閒談間提吓政治。每次席間有人抱怨九七後香港政府禮崩樂壞,總會有阿叔輩會標出嚟大大聲反檯:「你估啲美國佬又係好人牙?殖民地時代港英政府幾仆街你又知唔知?」直頭係條件反射一樣。

即係咁,今日香港政府嘅好與壞,同美國佬係咪好人,又或者港英政府仆唔仆街,應該係兩個唔同嘅topic嚟嘅。大中華愛國者總係無時無刻都要掛住啲鬼佬,何必呢?

成日都講,政治邊會有好人㗎,即使係歐美世界民主社會都係咁話。香港人亦唔會天真到,覺得外國社會單單為咗公義就會去幫呢個遠在東方嘅城市,當中一切都係利益啦。如果阿叔輩嘅原意係想提醒大家要「提防壞人」,咁其實就真係多咗啦。但又如果,阿叔嘅目的係想以臭蟲論去粉飾一啲事實的話,Errr…一件豬扒,即使企喺另一件豬扒隔離,都唔會變成靚女的。

廣告

至於豬扒同另一班豬扒企埋一齊,其實都總會有一件特別醜特別嘔心。嗰件係邊個,其實你知嘅。

如果唔係,做乜會咁早送曬啲仔女出國讀書呢?又係你話嗰啲國家嘅人係仆街嚟吖嘛,因住啲仔女喺嗰度學咗人哋啲價值觀,返嚟激L死你呀。

作者 Facebook

(標題為編輯所擬)