立場新聞 Stand News

武漢肺炎掀起新中美新冷戰序幕

2020/3/18 — 21:31

習近平、特朗普

習近平、特朗普

武漢肺炎疫情肆虐全球,中美關係越趨緊張,隨住疫情喺歐美地區迅速擴散,中共連同各地小粉紅積極宣傳武漢肺炎起源於美國,特朗普喺 Twitter 直接命名為「Chinese Virus」(中國病毒)後中國外交部報復式地驅逐美國《華爾街日報》、《紐約時報》、《華盛頓郵報》記者,禁止從事新聞工作,港澳地區包括在內,正式打響以中美為首嘅新冷戰時代第一槍。 

眼見歐美等地因為疫症而忙不過來,歐美股市崩盤式下跌,經濟面臨衰退,特朗普面臨大選壓力,中共此時借疫症打擊西方霸權,欲取代美帝地位。好似 911 恐襲美國後,美帝將專注力放喺防恐、中東戰役,造就咗中共十幾年嚟一路膨脹成世界第二大經濟實體;到 2020 年,中共打緊一樣如意算盤,趁住西方各國應接不暇,歐美各自為政,斷絕往來之際,搶佔世界鰲頭之位。「捐助」醫療物資俾意大利抗疫,從各省派遣小隊「支援」各國,中國扮演拯救世界英雄角色,正係現代「合縱連橫」之計 。

相比起當年冷戰時代嘅「共產國際」聯盟,現時中共嘅盟友只有俄羅斯、北韓與伊朗。伊朗自顧不暇,俄羅斯、北韓態度曖昧,中共喺國際戰線上嘅真正盟友係 WHO 呢啲國際組織同一帶一路買番嚟嘅非洲、拉丁美洲等小國,配合大量網軍五毛、戰狼外交部、海外小粉紅,製造輿論,搶佔話語權。

廣告

今時今日嘅冷戰唔再係太空競賽、工業競賽,而係輿論戰同資訊戰。網軍大量進駐各社交平台,Twitter、微博、Facebook 等系統性地散播假消息,除咗要洗脫中國武漢係疫症源頭之外,更彰顯西方民主體制嘅不濟,突顯「中國模式」嘅優越性。加上由世衞向各社交媒體巨頭施壓,限制網上言論,先有 YouTube 嘅「黃標事件」,所有提到「武漢肺炎」嘅影片全數不能登廣告,打壓黃色 KOL 嘅收入來源;再有今日 Facebook「錯誤地」大規模摒蔽關於武漢肺炎的發帖;驅逐美國駐中港記者更加係直接打壓新聞自由。

舊冷戰時代係共產主義同資本主義制度嘅鬥爭,而新冷戰世代係自由民主法治人權等西方普世價值同以利益穩定換取人權自由嘅中共社會主義價值之間嘅對碰。新冷戰思維矛盾更加尖銳,兩個陣營之間不存在任何溝通同商討的可能。所有協商都要建基於客觀嘅事實,以客觀而唯一嘅事實作為出發點。但中共模式係連客觀嘅事實都不存在,一切都以「黨的利益」為依歸肆意扭曲,隱瞞疫情變成為全球買時間,禍首變成救世主。

廣告

當年冷戰的主戰場係柏林,而今日嘅冷戰主戰場就係香港。香港係中西方利益交匯處,兵家必爭之地。中共缺外匯、資金流緊張嘅情況下,香港成為最重要嘅集資同洗錢窗口,香港獨特嘅「一國兩制」設計成為新冷戰時代下嘅東西柏林,雖然無物理上嘅圍牆,但兩種意識形態喺香港嘅交戰更加熾熱同激烈,19 年由香港人發起嘅「反送中運動」只係兩大陣營嘅前哨戰,20 年武漢肺炎肆虐全球後嘅勢力再洗牌先係新冷戰嘅序幕。

要扭曲事實、篡改歷史,報導真相嘅傳媒就係中共嘅最大敵人,香港人對呢種手法十分熟悉:警謊拘捕《蘋果》黎智英、攻擊《立場新聞》記者、打壓港台《頭條新聞》嘅手法就係要抹去事實、篡改歷史。今日驅逐美國記者只不過將地方戰升級到國家層面中美間嘅直接較量。對第四權嘅掌控,中共要將魔爪伸到香港以至全世界。

「中國模式」喺香港運行廿年完全失敗,去年以嚟香港人全面覺醒,林奠政府完全無法管治,中共只能夠以軍政府手段鎮壓反對聲音。到今日將出入境管治權、新聞自由全數收歸國家管理,港共政府無緣置喙,直接管治香港,等同官方宣告收回「一國兩制」下嘅高度自治,香港與中共之間已經完全沒有緩衝,成為中美角力嘅第一道戰線。

香港人係最深切體會中共邪惡嘅一群,亦都係擁有國際視野嘅一群,世上絕無僅有能純熟運用中英文、連結華文社會同西方世界嘅民族,比台灣更優勝,所以喺新冷戰時代香港人要積極發揮關鍵作用,認真事實,向外宣揚,「武漢肺炎」永遠始於武漢,「中國病毒」永遠因中國而生。堅決反對「中國模式」管治,喺體制內外所有戰線全面抗爭,配合美國為首嘅西方世界抗衡中共霸權。香港要走出困境同中共嘅魔爪,目前係絕無僅有嘅時機。

發表意見