立場新聞 Stand News

【武漢肺炎】餐廳食客減半 渣哥︰為咗香港政府蝕 一啲都唔值得

2020/3/28 — 21:24

「為抗疫,我明啊,你叫我唔好咁、唔好咁,我都可以做。但係細個父母叫你唔好,講完都會畀粒糖你啊,依家乜都無。」政府昨日推出新一輪抗疫措施,今日下午 6 時起,廳餐只可以坐半滿、枱之間相距 1.5 米、要為客人探熱等,人稱「渣哥」的黃店「大渣哥茶記」老闆蔡強榮,講起這項新措施十分勞氣。

14 人空間做 8 人生意 抽走枱櫈無位擺

「喂,膠紙唔係咁貼呀。」「呢張台唔好擺中間。」下午 5 時,「大渣哥茶記」內仍座無虛席,渣哥一邊跟客人打招呼,一邊指揮員工重新擺放店內的枱櫈,應付限制人流措施,員工不敢怠慢,卻顯得有點手忙腳亂。

廣告

新措施規定,枱與枱之間要相距 1.5 米或有分隔,渣哥就拿著捲尺「左度右度」後,叫員工抽走 3 張枱,窗邊平時坐 14 人的空間,頓時只能坐 8 個人,看起來十分空曠,「琴晚返到來餐廳,同啲伙記一度,大家都呆咗,根本唔使講都知剩係做得一半生意。」

抽走的枱櫈要放在哪裡,又是另一個問題,渣哥指部分抽走的枱櫈可以「捐窿捐罅」在店內搵位「攝」,實在抽不走的,唯有臨時用皺紋膠紙在枱面貼個交叉,再貼上告示,「我鋪頭就話 4000 呎,都無位擺,你叫啲小店點算,係咪要租倉,租倉係咪政府畀?」

廣告

不要說租倉費,最基本的鋪租、員工薪金,都得不到政府任何補償,「稅你就識收,你搞到大家開唔到檔做唔到生意,不如叫大家都唔好做生意,但政府要找數。」

誤會措施今晚半夜生效 渣哥︰新措施不公道

渣哥憶述,昨日下午 6 時許,揸車的時候聽到電台直播,才知道政府要落實限制餐廳人流,「坐定定」在車聽了半小時。他最不滿的不是餐廳人流要減半,而是特首的態度,「最嬲係政府後知後覺,一早唔封關,搞到啲嘢咁急,仲講到係自己成功帶領抗疫。」

當晚漏夜召集員工開會到 12 點幾,渣哥還一度誤以為新措施是今晚半夜才生效,直至今早秘書 whatsapp 提醒,才知道原來是 6 點生效,他又急急腳趕回店內,提早部署。

他批評,政府推行新措施過急,沒有任何諮詢,甚至沒有正式通知業界,所有資訊都要靠他們自己上網找,再慢慢研究,「我哋都叫做 smart 嘅人,都差啲搞錯,你叫嗰啲唔上網、開小店嘅人點應對得切,然後 6 點一過,就話要告人,要罰坐監 6 個月。」

渣哥認為,新措施並不公道,林鄭昨日公布關閉 6 種場所,卻只要求餐飲業需要人流減半,「剩係餐飲業先高危咩?乜嘢鋪頭都可以多人。」他認為最公道的做法,是除必要行業外,強制所有店鋪關門,但一定要補償鋪租和員工薪金,「政府絕對賠得起,不過啲錢用晒去起大白象工程咋嘛。」

新措施生效 生意額至少減一半

「搞一間餐廳幾多心血,就畀政府一下搞亂晒。」他續說,新規例要求餐廳要為客人量體溫、提供搓手液,「你又知一定買得到探熱計、搓手液?買得到,又有無規管過價錢?特首一句,講就易。」

他批評,自疫情爆發以來,一直是民間自發抗疫,政府沒有任何支援,如今新措施一生效,生意額一定跌一半,「如果為咗齊心抗疫,蝕都無所謂,但係如果為咗呢個香港政府,我就覺得一啲都唔值得。」

發表意見