立場新聞 Stand News

歷史巨輪下嘅成王敗寇,要殺頭㗎!

2020/6/27 — 15:48

梁愛詩提及早前到訪學校,有歷史老師詢問教孫中山及毛澤東革命史會否違法,梁形容自己同意批判式教育,但老師教導時應「有底」:「第一樣你要話俾學生嘅係每個人對國家都有責任,之後先講話如果你對政權不滿意、要搞革命喇,你就要諗一諗,『成者為王,敗者為寇』。如果你係失敗嘅時候,你係殺頭㗎。即係你要話俾佢知無『違法達義』呢樣嘢:你採取咩咗嘅行為,你要承擔責任。」。——《立場新聞》6 月 26 日報道

梁愛詩話「冇違法達義呢樣嘢」,喺邏輯上係唔成立:唔通孫中山搞嘅係「合法達義」嘅革命?(笑)抑或辛亥革命其實係「違法違義」?如果係違義,點解孫中山又會俾後世讚頌?

實情係,部份「時代革命」嘅抗爭者的確係做緊違法達義嘅行為,只不過呢個「不仁不義嘅政府」會用手上嘅「法」去打壓佢哋,以維護自己嘅獨裁統治地位以及所帶來嘅既得利益。

廣告

不過,梁愛詩指革命係「成王敗寇」丶「失敗咗要殺頭」,總算係老虔婆咁多年嚟,罕有講得通嘅幾句說話,我相信絕大部份「時代革命」嘅抗爭者都認同呢個係佢哋而家要面對嘅真實情況丶亦係「自古以來」大部份人民反抗暴君嘅真實情況——所謂「殺頭」可以係死,亦可以係坐監,總之係指要受到獨裁政權施予嘅刑責.......

真心,老虔婆呢兩句真係講得好公道;

廣告

不過,我想話,公道嘅說話佢只係講咗一半,其實仲有下半段:

人民搞革命失敗要殺頭,

啱!

不過,狗奴才助紂為虐,一旦人民革命成功,暴君同狗奴才都要俾人民送上斷頭台,一樣係「成王敗寇」,一樣係要「殺頭」。

十二碼嘅嘢,一係入,一係唔入。50/50㗎咋!

梁愛詩,我想引用前總理溫家寶嘅一句名言贈你:

「是人民在養你們,你們自己看著辦!」

發表意見