立場新聞 Stand News

比廢老聯盟消費之外ㅤ我哋應該認識的 TNN

2020/5/10 — 13:13

作者製圖

作者製圖

TTN 就係要你知道。TTN 就係呢種態度。

早幾日班廢老搞個咩「再出殯大聯盟」,仲厚顏無恥偷 TTN Farewell Show 嘅片嚟用。諗起場 show 嗰日,我有幸喺現場,錄低咗華哥同傑佬呢段話,一直想 share 出嚟,呢個都係一個好時機。(條片我 upload 喺 Facebook post comment。)

諷刺嘅係,喺董建華梁振英消費 TTN 嘅同時,佢地應該唔知條片當日成晚,只要音樂稍停,成個 TTN 台下都係「光復香港、時代革命」、「香港獨立、唯一出路」此起彼落,而台上嘅樂手,都多次同我地一班觀眾一齊屌黑警、屌政府,高舉五一手勢,喺台上大嗌「七二一,唔見人,八三一,打死人」等。

廣告

獨立音樂/搖滾樂嘅精神就係反建制,就係自由。而呢個亦係港共政權最深痛惡絕嘅思想。2017 年,當梁振英仲係特首時候,英國樂隊 This Town Needs Guns 嚟到當時仲係叫 Hidden Agenda 嘅 TTN 表演,入境處嘅人嚟 HA 放蛇,聲稱台上嘅樂手係「黑工」,要求封鋪拉人,及後更加報警,成隊軍裝警衝入 This Town Needs Guns 呢場音樂會,以「阻礙公職人員執行職務」、「普通襲擊」、「非法勞工」等罪行拘捕樂隊及場地負責人等八人。

政府日日美其名要活化工廈,卻選擇性執法,你從來唔見會有一隊軍裝警衝入非法運用工廈嘅楊明燉湯。偏偏法例唔清晰,即使 HA/TTN 已經多次同消防署/食環等部門溝通,去符合消防條例等等,政府依然堅拒批出牌照,更加嚴厲打壓呢個國際著名嘅香港獨立音樂聖地,就係因為獨立音樂圈係呢個建制政權眼中嘅壞孩子。

廣告

結果 TTN 被迫搬到去油塘,負擔極昂貴租金去租一個商業用單位,先勉強暫時避過政府嘅打壓。就算香港音樂圈冇乜人俾錢入場支持,就算租金極貴不停蝕錢,TTN 呢班人都繼續撐落去,皆因佢地相信香港呢片土地,需要好多而家缺失咗嘅嘢。

This Town Needs __
Guns? Music? Livehouse? Culture?
Freedom? Liberty? Democracy? Justice?

Hidden Agenda 改名為 TTN,就係因為呢個場地,係一個地方俾一班有自由意志嘅香港人,一齊喺度透過音樂、透過文化,去探究香港未來要有嘅出路。

可惜嘅係,因為抗爭、因為中國武漢肺炎嘅打擊,本身受政府打壓經營已經困難嘅 TTN,終究頂唔順要結業。香港就咁失去咗最重要嘅獨立音樂聖地,一個可以任意俾樂手觀眾一邊搞音樂會,一邊大嗌「香港獨立」嘅自由地。

「有啲口號,唔係得個嗌字,要撐,就撐 X 到盡。」
「呢首歌,叫兄弟。」

如果你睇條片到最後,會聽到樂隊逆流主音傑佬講嘅呢句話。我相信,所有有獨立自由意志嘅香港人,努力令我地呢個城巿變得更好嘅人,我地都係兄弟手足,無論喺邊個崗位、邊個場合我地都應該要互相撐 X 到盡。

場地負責人呀和喺結業當日講過:「光復咗香港之後,我地就會返嚟。到時都要有咁多人嚟睇喎!」

就等我地約定,無論係光復香港,定振興本地獨立音樂/文化圈,我地都要盡力去做。希望有一日,除咗喺煲底相認,亦可以喺重光嘅 TTN 一齊再欣賞屬於自由獨立香港人嘅音樂。

記得,撐到盡。

「這一刻,對抗輪迴於這麼悲哀的世間。」
「雙手緊握,擊碎那虛假定律。未怕,埋葬六呎之下」

逆流 —《六呎之下》

 

作者 Facebook

發表意見