立場新聞 Stand News

民主社會唔需要朝廷恩賜

2020/3/1 — 11:25

新一份財政預算案發表之後,陳茂波嘅評分大升近 17 分,由 26.6 分,升至 43.5 分,呢個前所未見嘅升幅明顯就係因為派一萬蚊所致。原來每人派一萬蚊,「囤地波」就從來無囤地;醉駕就從無發生過;派一萬蚊就可以洗底。難道呢 711 億係佢自己荷包到出嘅?用香港人納稅嘅錢派番俾香港人,只係慷他人之慨,點解就會民望大升?個邏輯喺邊?呢種民望急升嘅現象,係最令人憂慮嘅地方。

因為好一部份嘅香港人嘅思維仍然停留喺封建時代被統治模式,下意識地覺得派錢就係政府皇恩浩蕩,開倉濟民,要感恩戴德。肯照顧黎民百姓嘅生活苦況就係「好官」,呢個封建嘅思想到咗廿一世紀嘅今時今日仲普遍存在喺華人社會當中。

派一萬蚊令陳茂波民望急升,循住同一個思路,林奠便急不及待咁帶住三司十三局東施效顰,捐一個月糧俾公益金,想表現愛民若子、視財錢如糞土嘅父母官形象。更加嘔心嘅係,個班俾林奠喺小報告到向中央「篤背脊」表現差劣嘅行會成員、建制派,都一齊獻媚,緊跟林奠衫尾,搶住捐款。

廣告

一千幾百萬連零頭都不如

事實上,比起 UGL 五千萬、鄭若驊夫婦清拆僭建嘅費用、新界囤地所得利益、工聯會包銷口罩嘅八億,呢一千幾百萬連零頭都不如,只係獲利回吐。捐錢唔代表班官愛民如子,只代表佢哋窮到除咗錢乜嘢都無。與其諗佢哋捐一個月糧,不如調番轉諗,點解香港人要每年用過億嚟請呢班除咗派錢捐錢之外就乜嘢都做唔到嘅「廢官」?

廣告

呢幾日仲有幾單新聞,放埋一齊對比住睇,就知道中共同港共嘅管治思維: 

順我者倡,逆我者亡的管治模式

以上幾個例子,就係想宣揚八個字 :順我者倡,逆我者亡。只要支持港共政權同背後嘅中共,就會有好日子過,有一萬蚊派,有工程做,唔會俾人檢控;相反,就會用盡一切手段去打壓、檢控,整個政府都會與你為敵。「一手硬,一手軟」,一係跪喺到做順民,一係被強力鎮壓,直接將大陸嗰套套落嚟香港直接管治,比以往更加露骨。

中共要貫徹「普天之下,莫非皇土;率土之濱,莫非王臣」嘅封建統治模式,蟻民嘅福利係嚟自統治者嘅恩賜,代價就係對政權嘅絕對服從,根本同「民主」社會嘅方向發展背道而馳,上年起嘅公民覺醒就係中共港共首要要打壓嘅苗頭。

無愛民如子嘅父母官,只有稱職廉潔嘅公僕

香港人幾時先明白「民主」係指「人民當家作主」。喺民主世界入面,無愛民若子嘅父母官,只有稱職廉潔嘅公僕。人民納稅去聘請官員組成政府管治一個地方,為人民謀福利係佢哋嘅職責,做唔到就係失職。民主社會係「由下而上」嘅民意政制,而唔係「由上而下」嘅恩賜施捨。唔好再妄想中央會派一個精明能幹嘅「包青天」撤換林奠,咁就雨過天清,一切回復正常。我們早就回不去了。

發表意見