立場新聞 Stand News

法庭聽審後記

2020/5/5 — 23:28

作者 Facebook 圖片

作者 Facebook 圖片

今日去法庭支持幾位爭取民主嘅前輩。佢哋響民主運動有唔同角色,阿人就為勞工、工會打拼,而黎智英就係一個支持民主運動,但同時信任自由市場嘅生意人,楊森更加係民主政黨嘅老手。

佢哋可能以往有好多唔同嘅意見,就好似爭取最低工資咁,當時嘅《蘋果》都係慢慢先轉向同情工人嘅一方。但無論如何,喺暴政之下,今日都要響法庭相見。

非常感慨香港走到這一步。有時回心一諗,佢哋後生時為咗推動香港民主,付出咗唔少。今天,佢哋走到去犯人欄,依然係為咗爭取香港應有嘅民主,去承受被補同埋政治檢控嘅壓力。

廣告

大家都明,可能因為佢哋有一定知名度,警察唔夠膽對佢哋動粗。但喺呢場運動,我哋有好多手足冇咁好彩,佢哋喺被捕時,有人被打至半死,有人嚴重受傷,有人甚至喺被追捕嘅時候身亡,連向家人道別嘅機會都冇。諗到呢度,心頭一酸。

但喺庭上,控方都係一貫追殺示威者嘅態度,臨開庭前 5 分鐘,先話要加重保釋條件,一條公安惡法下「未經批准集結」罪名,控方當正佢哋會走佬,要求增加去警署報到次數同埋唔可以離開香港。法庭最終冇就住呢條公安惡法而批出咁苛刻嘅保釋條件,但我知道好多手足都同樣面對緊還押、嚴苛嘅保釋條件等等,呢個威權政府之下,法庭已經淪為政治打壓嘅工具,用來解決政治問題,以刑責去威嚇我哋屈服。

廣告

我想講︰慳啲啦!由舊年 6 月到依家,我哋對於五大訴求,依然係寸步不讓!

無論如何,我相信無論係和理非前輩定係前線手足,佢哋都想我哋繼續爭取,俾啲掙扎,唔好放棄。香港人加油!

 

作者 Facebook

發表意見