立場新聞 Stand News

泛民老人嘅原罪係九月立法會的死結

2020/3/9 — 12:50

2019 年 7 月 1 日,立法會議員梁耀忠一度攔阻示威者衝擊立法會大樓,被一名示威者抱走。(有線新聞報道截圖)

2019 年 7 月 1 日,立法會議員梁耀忠一度攔阻示威者衝擊立法會大樓,被一名示威者抱走。(有線新聞報道截圖)

1. 理性上,好多抗爭者都知道立法會過半憲制上嘅重要性,但係有兩個死結: 一係功能組別選舉不公平嘅原罪,二係傳統泛民嘅不作為,令有意投入選舉工程嘅選民卻步。

2. 功能組別嘅不公平係無容置疑,但事實上成個選舉包括地方直選本身都係不公平,挾六成民意最終只得三成席位,單單否定功能組別唔去參選並非理性之舉。

3. 反而,一大部份年輕選民嘅最大心結在於多年嚟「含淚投票」,保送一班尸位素餐嘅泛民議員入去議會,但係又唔能夠反映到選票嘅政治取態,而呢個心結係對九月立法會最大抗拒嘅主因。

廣告

4. 泛民嘅原罪在於廿幾年嚟喺議會入面作為少數派只流於表面做 show,並無展現抗爭意志,淨係企喺道德高位「食老本」,憂讒畏譏。當對家係無底線嘅黨國機器嘅時候,仲為保存自己嘅清白之身而拒絕泥漿摔角,根本同社會激烈嘅抗爭行為完全脫節。

5. 當中嘅表表者同罪孽最深嘅係梁耀忠,當日為咗自己唔想承擔「劊子手」嘅責任,DQ 梁君彥,拒絕擔任立法會大會主席選舉嘅主持人,直接導致四年嚟嘅制度暴力、倒行逆施,到現今都未展現悔意,因此人民對佢嘅恨意絕不下於一般建制派。 

廣告

6. 傳統泛民老人只顧及一己榮辱,相反,喺呢九個月嚟咁多抗爭者連自己嘅前途、自由甚至性命都豁出去嘅時候,呢班人仲守緊自己嘅「政治貞操」,點會唔受鄙視?

7. 明知擂台上面嘅對手會插眼、撩陰、出蠱惑,加埋個裁判吹黑哨,仲死守個人政治道德,呢啲唔係叫正義,係叫不負責任同無膽匪類。既然你哋無咁嘅抗爭意志,咁不如留番俾啲素人新人,實現政治輪替,世代交接。

8. 抗爭者對進攻議會最大嘅憂慮係,即使立法會議席過半,呢班被民意保送入去嘅議員,有無足夠嘅抗爭意志去攬炒?敢唔敢背住財政懸崖、政府停擺嘅壓力去否決綑綁警隊大幅增加撥備嘅財政預算案?俾你哋做咗大會主席有無膽量學梁君彥、陳健波之流運用權力去達致最終目的?定係繼續抱殘守缺,行禮如儀,最終跪低?咁立法會過唔過半真係無意思。香港宜家目前情況寸土必爭,並沒有婦人之仁嘅存在空間。

9. 人民嘅眼睛係雪亮嘅,唔係單單揹咗「泛民」個名就一致拒絕所有泛民議員;泛民本身亦都唔係得一整個板塊,即使係同一個政黨內嘅光譜都有所不同。

10. 舉民主黨做例子,同屬民主黨嘅許智峯、鄺俊宇係抗爭者心目中嘅形象就同黃碧雲完全唔同,因為佢哋同示威者企喺最前線;同樣公民黨嘅楊岳橋喺現時香港法治已死嘅情況下仲未 over his dead body,相反黨友毛孟靜會被抗爭者稱為「契媽」。

11. 同樣係主持選舉議會,當日「送中條例」法案委會員選舉主席,涂謹申則以主持人嘅權限,拖延選舉同二讀展開,到委員會鬧雙胞,最後要直上大會二讀。雖然涂謹申未竟全功,但至少有喺佢嘅權限之下盡力喺議會內彰顯民意。

12. 經過九個月,香港已經永遠返唔到轉頭,要突破困局,要選民摒棄前嫌,泛民首先要摒棄一貫做法,堅拒俾港共政權道德綁架,不惜「攬炒」先係唯一破局同解開選民心結嘅辦法。

13. 如果做唔到、過唔到自己個關嘅就走。棄選立法會,或者出戰名單第二名,為新人抬轎,騰出位置俾素人參選。不論地區直選抑或功能組別,每一個參選人都應該明確擁抱「不惜代價攬炒」以換取市民支持。

14. 宜家連新民黨都可以因應時局搞初選,容許黨外人士參與,點解口口聲聲講要為香港人爭取「五大訴求」嘅泛民人士摒棄唔到自己嘅個人榮辱同得失?

15. 喺現今警暴對人民毫不留情、悼念亡者都會係非法集結、喺黑白顛倒嘅年代,我們容不下丁點婦人之仁,梁耀忠之流應該反省下自己仲有無存在嘅價值。

發表意見