立場新聞 Stand News

準備好失去一切,只因世界只有此處為家

2021/2/20 — 10:57

「好鐘意香港」,呢一句熱門文宣口號,我好少講。因為對一片土地嘅愛,係要做出黎,唔係講出黎。以下講嘅,大抵唔少讀者會唔啱聽,但我想講嘅係 — 留係香港嘅決心。

今日同朋友講起一句,「其實今時今日留得係香港嘅,都係排隊㗎啫,遲早到自己。留得係度,就預左有一日清算會到,預左有一日會突然失去一切。」旁人在四竄,我們留在這地,只係因為我地仍然天真地相信,呢片屬於我地香港人嘅土地,仍然有值得守護嘅地方。從 2019 年抱住赤子之心走上街頭,我地為嘅,唔單係民主自由,更加係一個民主自由嘅香港。

今日又拉返一班理大手足,清算無日無之,我地可以選擇離開,當一個新移民,找一個新祖國繼續做人,呼吸別國自由嘅空氣。但我地更加想嘅係,係自己嘅家,同自己嘅家人朋友、手足、其他香港人,一齊係獅子山下、係維多利亞港旁、係煲底享受自由、安居樂業。

廣告

世界再大,只有我地係香港人;而我地香港人亦只有此處為家。

堅持唔走﹐係因為呢個家值得我地用盡一切嘅賭注去嘗試守護,即使時代再暗,只有最絲微希望救返香港我地亦會繼續係度頑抗。清洗呢一片土地,要令「香港」係世界地圖上不再存在實在太簡單,只要迫到我地全部離開失散就得。我地不願接受香港落得呢個結局。

廣告

哪怕留得係度,就要承擔一種恐懼,一種隨時被捕然後失去一切嘅心魔。身土不二,就係會與呢片土地共存亡到最後一刻。香港之所以要係香港,總要有香港人係度。我地就係真真正正嘅香港人,我地唔留,邊個留。

任憑大家點想像移民後建立新族群,事實係,世界唔會再有第二個香港。就算某日某國,大方到讓香港人改一條街名做彌敦道,「新彌敦道」亦永遠唔會有我地同三五知己篤過魚蛋嘅味道、同大學組眉影過 MK 相嘅回憶、更唔會有百萬手足係度一齊流淚流涕嘅煙味。

總有人因政權迫害去到絕對非走不可,但如許智峯所言,「永遠無法在另一個地方落地生根」,只要你係一個真正愛過香港嘅人。

非走不可嘅,我地明白。我地就留在切爾諾貝爾此地等你,等你地回來再聚。仍然有能力有空間留多一日嘅,就留多一日,哪怕只係減慢香港嘅死去半小時,我地都要竭力爭取呢一線空間,去期待黎明。儘管冒險,都值嘅。

因為,我哋真係好鐘意香港。

而世界,只有此處為家。

作者製圖

作者製圖

作者facebook

發表意見