立場新聞 Stand News

為什麼要民主?

2020/6/6 — 23:01

民主唔可以當飯食,民主唔能夠解決所有社會問題,民主唔係一帖能醫百病嘅萬能藥。

反而,民主制度唔單止效率低,仲會引伸好多流弊、腐敗。但係民主始終最能夠保障人民利益嘅體制,保障人權嘅基石,維護法治嘅根本。

兩年前,韓國瑜騙倒了高雄市市民,高票當選市長;兩年來,政績全無,所有承諾都只係假大空嘅空話。其「中共代理人」嘅身份更加表露無遺,除咗輸咗年頭嘅總統選舉,今日更加敗走高雄,成為台灣第一個被罷免嘅市長。

廣告

民主體制給予人民對民意代表長期監察嘅權力:人民可以授權,亦可以收回,「君權民授」。民意嘅制衡提醒著每一個當權者:「當你們背棄了人民的利益時,人民最終有權用選票將你從高位扯下來」。

所以,中共及其傀儡係永永遠遠不能夠真正抱擁民主體制。中共要嘅係永掌實權,不容挑戰嘅君臨天下。只係睇下呢一年嚟,林鄭及其班子係二百萬人上街,民意支持度長度處於負數之下,仍然可以厚顏無恥咁受香港納稅人供養著,更掌握住香港人嘅經濟命脈、生死大權,就知香港嘅民主自由從來都係笑話。

廣告

只要係中共掌權嘅一日,所有「民主」只會被利用作為暴政面上貼金嘅工具,人大就係一個咁嘅機關,嘗試將人皮披喺身上去掩飾狼嘅本性。識用刀叉嚟食人肉唔代表文明,亦掩不住嗜血嘅本性。

罷免、直選、人民授權呢啲概念喺中共眼中係永遠不可能,係 404 not found,係顛覆國家,係分裂國家嘅滔天大罪。正因為內心虛怯、懼怕民意,所以立「港版國安法」有其迫切性;正因為虛怯,所以一邊講國安法有二百幾萬市民簽名支持,但係一邊永遠唔敢公投或者透過民意機關立法。

民主很脆弱,民意容易被唆擺,民情很容易被騎劫,選舉程序很容易被濫用,一不小心就會被暴政乘虛而入。放眼台灣、香港兩個唇齒相依但命運各異的兩地,台灣人真係要好好警惕,三省吾身,悍衞得來不易嘅民主自由,免蹈今日香港嘅覆轍。

發表意見