立場新聞 Stand News

無票,我哋連唔要嗰一萬蚊嘅權力都無

2020/2/28 — 12:53

大家好嬲新一份財政預算案將回水一萬蚊同警謊大幅增加撥款捆綁埋一齊,成日講「我哋寧願唔要嗰一萬蚊,都唔想俾黑警袋錢」,其實呢個係偽命題,事實上係「我哋連唔要個一萬蚊嘅選擇權利」都無!

因為無票。

民建聯點解會支持派錢,要急不及待咁出嚟宣佈「成功爭取」?因為九月有選舉;點解林奠要先派三百億俾商家、飲食界,因為九月有選舉;林奠對中共嘅機密報告,抗疫嘅目標都係九月嘅選舉。對家早早喺大半年前已經上下其手務求去控制九月嘅選舉,就知佢哋幾驚九月立法會過唔到半。

廣告

立法會過半,可以選出泛黃嘅財委會主席,將警謊加人工嘅議程排到最後;立法會過半,可以 vote down 財政預算案,迫使政府抽出警謊開支預算審議;立法會過半,可以 vote down 23 條立法。

根據《基本法》50 條「立法會拒絕通過政府提出的財政預算案或其他重要法案,經協商仍不能取得一致意見,行政長官可解散立法會」;《基本法》52 條「香港特別行政區行政長官如有下列情況之一者必須辭職:……(三)因立法會拒絕通過財政預算案或其他重要法案而解散立法會,重選的立法會繼續拒絕通過所爭議的原案」。

廣告

過半立法會議席係憲制上可以推翻政權嘅 veto power,所以新任中聯辦主任駱惠寧講到出口:圖謀奪取立法會過半數係反對派想奪取管治權。

面子係奪取立法會控制權,裡子係迫使進一步攬炒

當反對派真係奪取過半立法會議席,可以預見中共港共會再次撕翻臉,搬龍門唔認數,可能會落閘唔俾反對派參選、DQ 哂啲當選議員,甚至俾軍警包圍立法會或者進入立法會大廳用槍指住立法會議員投票……軍政府有好多齷齪手段可以扼殺民主。但係中共絕對唔想行到呢一步,如果咁做嘅話,就真正自己拆咗《基本法》同一國兩制嘅牌匾,俾西方各國界入點去進一步干涉,甚至取消香港獨立關稅區,實現攬炒。

港共最想見到嘅係穩定,維持現狀,向外宣揚「一國兩制」運作正常,繼續用「高度自治」嘅遮醜布去維繫佢哋嘅極權統治,買時間去建立軍警政權,繼續為中共賺外匯。相反,體制內外嘅抗爭同進逼,都係逼使港共同中共唔可以維持現狀:要麼給予港人真民主自由,要麼撕去假面具,玉石俱焚。進攻立法會過半數議席,相反嚟講係要迫使佢哋做更多倒行逆施嘅手段去實現攬炒,呢個係要全面選舉嘅「裡子」。

制裁,又如何?

最近嘅爭議在於「進佔功能組別等同永續不義選舉」,宣傳寧願放棄都唔應該 endorse 不公平小圈子選舉,應該著眼於要求美國落實《香港人權及民主法案》,全面取消功能組別。

現實啲睇,美國上年通過咗《香港人權及民主法案》,但係警暴有無減弱過?新一份財政預算案將警謊嘅預算大幅提高,增加編制去到三萬八千人,用三倍嘅預算買催淚彈,多六部銳武裝甲車,就係要更進一步鞏固香港作為 Police State 嘅武裝實力。美國嘅《香港人權及民主法案》隻手可唔可以伸到咁長去干涉香港嘅財政分配?

實際啲講,嚟緊立法會仲有半年就到,但係美股一個禮拜過大跌三千點,美國本土出現首宗本地感染武漢肺炎個案,嚟緊十一月就係美國總統大選,俾你係 Donald Trump,你會將精力投放喺香港嘅立法會選舉定係專心搞掂國內嘅疫情,以免被民主黨借勢奪取政權?兩黨朝野以至美國嘅民眾都會關心自己國家嘅疫情,多於香港嘅民主進程,呢個係不爭嘅事實。自己間屋都就嚟火燭,有無人會去關心住對面海嘅人餐飯食得夠唔夠飽?

退一步講,就算 Donald Trump 受到兩黨朝嘅壓力而動用法案制裁港共官員、黑警,美國可以做啲乜?可以唔俾佢哋進入美國領土,沒收或者凍結佢哋嘅資產,以至再進一步西方國家都實施類似制裁行動,會唔會阻止到港共批更多錢俾黑警買裝甲車、水炮車去打壓香港人?唔會。反而,呢班官員同黑警嘅西方夢碎,佢哋唯一嘅路就係對中共更忠誠,全面靠攏,執行北京對港嘅管治政策。到今時今日 ,緬甸對羅興亞人種族清洗都發生緊,美國同聯合國對緬甸加以制裁,但係昂山素姬仍然係緬甸嘅實質領導人,制裁,又如何?

再者,美國以至外國勢力要一個界入點去插手香港嘅事務,上年嘅反送中運動開啟咗序幕,但係要進一步介入,手伸得更深更遠,要更多嘅著力點同憑藉,一係更大規模嘅流血、拘捕,更多嘅新屋嶺,更多嘅陳彥霖、周梓樂,更明顯嘅人權打壓,呢樣係咪我哋想見到?係咪要學梁榮忠係《唐伯虎點秋香》咁大嗌「邊個夠我慘?」之後死咗?

全面落實雙普選,取消功能組別係無容置疑嘅目標,亦都係五大訴求嘅核心,但係並唔代表要永續功能組別,更加唔代表要永續泛民嘅支配。新一任飲食界立法會議員可以係龍門冰室老闆、唔再係「廿蚊張」;進出口界別議員可以係 HKTV 嘅王維基,而唔再係淨係瞓覺嘅黃定光。最重要嘅係進攻功能組別同其他體制外嘅抗爭,國際線嘅宣傳並不互相抵觸,亦都無排他性,反而係互為表裡,「兄弟爬山,各自努力」; 棄攻功能組別,堅守原教旨主義,只會為中共減壓,俾林奠用立法會大勝邀功,為港共政權幫上大忙。

發表意見