立場新聞 Stand News

現代焚書坑儒

2019/12/1 — 10:36

(左起)理工大學、中文大學、香港大學(資料圖片)

(左起)理工大學、中文大學、香港大學(資料圖片)

港大、中大、理大三間大學數以十億計的撥款資助喺立法會財委會被政府主動抽起,推說話因為某啲(建制)派議員對於撥款有憂慮,所以多啲時間解說。

呢單嘢可以見到呢個政府同建制派幾咁無恥、短視、低能。

1. 班建制派想用抽起大學撥款嚟到報復暴大、弓大嘅「暴徒」大學生,同埋想懲罰當中為學生發聲嘅校方(滕錦光除外)。政府話唔關佢哋事,只係驚唔夠票要多啲時間解說先再上,費事遭到否決。但係好明顯係扯貓尾,當時推逃犯條例嗰陣乜無議員提出關注、表示反對咩?代表商界都有好多建制派議員唔想搞,又唔見你哋咁從善如流咁抽起,再作解說先推?

廣告

2. 今次三間大學受影響嘅撥款係用嚟起醫務教學設施、圖書館,除咗直接影響教育質素,長遠係會影響香港醫療人才嘅供應同質素。醫療、教育從來都係政府嘅兩大支出,兩者都係好基本保障民生嘅開支,而班保皇黨影響撥款一次過影響到醫療、教育質素,直接影響市民嘅福祉。究竟邊個政治凌駕民生?

3. 大學生同大學從來都係社運嘅發源地,因為大學生有足夠嘅教育水平而無經濟包袱,佢哋係最有資格去推動社會群眾運動的一群,古今中外都係一樣。五四運動、八九民運,北大清華都係中堅分子,班保皇黨唔大聲話呢兩間係暴徒大學,要嚴懲佢哋?班藍絲唔出聲話拆哂北大清華用嚟起公屋?

廣告

4. 高等教育從來都係國際城市其中一個評級指標,所以各國政府都會出盡力、資源向國際推廣、發展自己嘅大學,喺國際爭一席位。大學排名亦直接影響咗 expats、外資會唔會落戶一個地方;對內更加係人文精神同科學研究嘅發祥地,一個國家同城市要進步,唔係靠三萬個毅進水平嘅恐怖分子,係靠大學科研,所以高等教育係代表咗一個城市嘅文明程度。自己嘅立法會連同政府主動咁去破壞自己嘅高等教育發展,全世界真係首屈一指咁匪夷所思。

5. 缺錢會影響大學發展同人才培訓,但相反單單錢係買唔到學術成就。相比起錢,「自由」先係最重要嘅因素。自由包括學術自由、言論自由、思想自由。從事科學研究唔駛驚邊個研究會踩到紅線,從事文學藝術創作唔駛就住政權顧慮去放膽創作,可以天馬行空,喺無邊無際嘅領域漫遊,文理醫工商科皆然。所以妄想喺政治、撥款操縱大學管理層,對思想施加無形壓力同審查,長遠嚟講呢個影響比起抽起十幾億撥款嚴重好多,深遠好多。當然,我哋嗰班短視又不學無術,或持有假學位嘅保皇黨當然唔會明白呢個道理。

6. 自由嘅風氣只可以喺民主嘅土壤先可以得到全面嘅保障,所以最頂級嘅科研成就、最頂級嘅人才,都係嚟自民主的西方國家,鄰國嘅大學有再多嘅資源、再多嘅人才都只能退居二流。

7. 控制大學嘅撥款,破壞香港嘅高等教育,如同焚書坑儒,無咗大量嘅人才培訓,無咗本地嘅科研成就,香港好快淪為二流城市,保皇黨同班藍絲嘅建議,其實係終極攬炒嘅開端。

 

發表意見