立場新聞 Stand News

當各個投票站都大排長龍

2019/11/24 — 14:09

立場新聞圖片

立場新聞圖片

早上起來,便看到網上被選舉新聞洗版,最搶眼球的是:有乜嘢動力令大量「廢青」晨早彈起身走去票站排隊投票?

選情如何,有待分曉,但坊間的政治氣氛也是過去選舉從未有過的熱烈。

簡言之,全民政治化。不管黃籃,都意識到政治和日常生活有密切關係(近幾個月的抗爭,連最不關心政治的人都牽扯進去,還可以覺得事不關己嗎?),自己揀乜候選人,好影響社會日後的走向。隨便走過一條街,都聽到有人議論政事,誰是誰非,講到非常肉緊,而且唔係泛泛而談,爭論揀邊個冧把咁簡單。

廣告

娛樂新聞,真係無乜聽人過了。有趣的是,很多人並非一面倒撐或反對示威者。

好似有個阿叔搭枱,同對面個阿嬸吹起水。阿叔憶述六七暴動時警察隨意捉人同打人。阿嬸就話自己識分黃藍,但分唔清乜派物派,仲問建制派係黃定藍。

廣告

阿嬸及後提到將軍澳一單打人事件,起初似係不滿黑衣人私了報警人士,但原來主要是埋怨在場記者不幫手勸交。講下講下,講到佢個女走去浸大哀求佢個孫番屋企,唔好再留守。原來佢另一個孫早前都被警察拉過,保釋中,佢個女唔想兩仔女都出事。

茶記仲有其他人傾計,茶客問侍應投咗票未。另一個老茶客又和另一個白頭佬吐苦水,話投保皇黨又唔想,但理大一役又令佢不安,對投那個年輕的候選人有猶豫。白頭佬同佢講,你唔想香港變大陸咁,就知應該投邊個。一名正在吃飯的女保安這時收到電話,同對方說,日頭要返工,夜晚至得閒,講唔夠兩句便收線。

作者 Facebook

發表意見