立場新聞 Stand News

當攬炒已經發生 工會戰線應該做什麼?

2020/7/8 — 14:40

作者製圖

作者製圖

好多人都問,工會戰線發展成點?點解到而家都未有大罷工?罷工公投又搞唔成,工會失敗了嗎?《国安法》立法之後的香港,我們還需要工會嗎?

其實,回顧去年今日,好多香港人未認識工會,以前嘅香港人,會覺得工會只係基層工人嘅事;而家好多人,就以為工會只是講罷工。工會當然要用盡方法,累積罷工實力。但係工會仍然喺職場、國際、公民社會,發揮重要角色,唔止得罷工依一面。

街頭、議會、國際、工會戰線,缺一不可。街頭抗爭持續對政權施壓,議會抗爭則令國際關注,圍堵牽制中共,換取香港人嘅時間同空間。為了香港共同體的未來,工會要提升各行各業、企業嘅入會率,同社區、議會、黃色經濟圈互動合作,帶動「和理非」升級抗爭。

廣告

簡單來講,工會戰線嘅任務,就係推動每人個人在自己崗位守護香港:

在職場,團結同路人。
在行業,打撃紅色資本。
全香港,邁向大罷工。
在國際,推進民間外交。

廣告

建立工會陣地ㅤ反擊紅色滲透

一個社會嘅崩壞,由人心腐爛開始。中共係一個冇道義嘅利益集團,以暴力及洗腦治國,令到大陸充滿貪腐、自私、愚昧、結黨營私、黑心無良,中共又繼續強化文化劣根性,以加強統治。

中共冇法子去管治香港呢一個國際城市,就唯有將香港變成一個普通嘅大陸城市,以輸入資本,控制香港,連大陸劣質文化一併輸入,更方便統治。

中共爪牙已進佔各行業,形成既得利益集團,令政治審查和白色恐怖彌漫職場。紅色資本為咗刮盡賺盡,對香港人剝削奴役;為咗政治表忠,鼓動職場督灰、交人頭。香港人返工已經夠慘,再咁落去,慘過落地獄,不如返大陸。咁香港就徹底玩完。

工會就係要在各企業、行業團聚同路人,抵住壓力,維護勞工權利及職場公義,令返工唔止係賺錢,亦真正係建設家園,建設公義社會。

我哋返工,靠自己努力及才能,有職業道德,有專業標準,唔會貪污、唔會造數、唔會弄虛作假、唔會豆腐渣、唔會搞特權、唔會走後門。香港經濟繁榮就係大家堅守核心價值嘅結果,公平、法治、公義,永不放棄。工會運動就係要在各行業、各大中小企業建立更多據點,團聚同路人,抵抗紅色滲透及政治壓力!

繼續國際工會戰線ㅤ民間外交啟航

我創立的第一個工會,本身就係國際工會。擔任英航工會主席期間,就響英國嘅工會手足身上,直接學習抗爭。

除游說政要之外,工會亦要建立平行的民間外交,令國際公民社會更加了解香港問題和中國因素,觸發更多人關心香港議題。國際工會就好關心香港政治情況,去年抗爭運動以來,各國工會都聲明支持香港人,向其國家政府反映,向中共施壓。

中共經濟爪牙處處,跨國壓搾,早已引起國際工會關注及譴責要國際幫拖,首先要自己強大,吹雞先吹得響!香港國際工會戰線,更需要更多香港人加入工會!

香港職工盟係「國際工會聯合會」(ITUC)成員,職工盟屬下主要工會,亦係國際行業聯合工會嘅成員。一班工會會員,普通嘅打工仔,持續多年民間外交,不斷接待來訪國際工會及政治團體,又要飛來飛去或者網上開國際會議。宜家新工會運動急速擴展嘅,聯繫埋經營多年嘅國際工會戰線,一定有更大力量!

我作為職工盟主席,打國際戰線係主要職責,希望入到立法會,將國際工會條同其他戰線更加拉緊,更加融合。中共在國際上四面楚歌,唔好放過佢!

「收成期」返大灣區ㅤ重奪生活自主權

工會抗爭係包括經濟性同政治性,前者如反擊老闆改合約、減薪,拖糧。去年開始,工會升級,開始政治性抗爭,推動全港大三罷。後來出現新醫護工會的救港罷工。行李門事件之中,為咗維護專業守則及乘客安全,我堅拒向權貴低頭,終於摑梁振英一巴。都係用自己專業,為香港人而戰。

香港人已經唔再係「打份工啫,唔關我事」嘅心態,在職場見到危害社會嘅事,大家一定唔會放過,沙中線豆腐渣,都有職場義士揭發!

中共利益集團不斷入侵,紅色資本結合媚共權貴,無視行業制度及專業守則,搶香港地,搶香港錢,勞役香港人,逼走香港人。香港人勞動成果更被剝削瓜分。

職場就係反擊嘅前線,我哋需要義士在各行業、各企業搞工會,爭取勞動成果、拒絕為中資不良行為服務、反對大白象基建,維護公義,奪回生活自主權。

香港係我哋家園,爭取自己權利,維護自己生活,由參加工會開始。「收成期」咁 X 愛中共,返大灣區共享榮譽啦。

勞動成果不送中ㅤ產業自主未來

成日話,香港靠大陸,冇大陸唔掂。但事實係,紅色資本每每落嚟「搵真銀」,大陸權貴移居香港,將資產轉移,又代表咗啲乜?到底係邊個靠邊個搵錢?

點講都好,香港人應該要有自己嘅民生經濟產業,呢樣係正常健康社會所需。

上一代香港人好多大陸落嚟,港英政府任由自生自滅,點知呢班難民自發自救,創造經濟奇蹟。之後中共搞資本主義,吸香港工業返大陸,另一方面,港英政府配合財團,搞泡沫經濟,令地產、金融成為香港經濟支柱。而政府的新經濟項目往往是『配合國家發展』,大白象往往非港人所需,本土產業發展也無從說起。港珠澳大橋、人工島,陸續有來,將香港人財富吸上大陸;另外,又催谷大量陸客來港,製造依賴性旅遊業,令香港經濟更畸形。

香港冇本土民生產業基礎,經濟繁榮 = 財團賺大錢,遇到經濟危機,港人越窮越見鬼。

如此的經濟模式只會扼殺本土產業發展。香港人要靠智慧及拼勁,提出產業未來的想像及規劃。在本土產業上,文創設計應有本地的產業化進程,旅遊業界應推動轉型,擺脫依賴陸客,彰顯本土文史。

工會手足支援黃色經濟圈的實業嘗試,同時提出產業未來的想像,為未來香港建立論述願景。

 

#工會戰線 #我的看法 #反国安法 #工會與經濟 #自主工運 #公民社會 #罷工之外 #民間外交

作者 Facebook

發表意見