立場新聞 Stand News

當特首淪為工聯會接線生,律政司為包裝女工,港共政府早已名存實亡

2020/3/6 — 12:15

1. 一日內,世界各國相繼向香港封關,日本宣佈暫停港澳免簽安排俄羅斯航空取消往來香港同莫斯科嘅航班泰國政府刊憲將香港在內嘅六個地區列為「疫區」,雖然駛唔駛對香港旅客作強制隔離眾說紛紜,但係已經打擊咗唔少香港人外遊嘅意欲。

2. 香港人咁鍾意返工,更鍾意放假去旅行,去日本係「返鄉下」,去台灣、泰國渡週末,宜家全部都無得去。放 no pay leave 但係坐困愁城,慘過要死,你估派個一萬蚊籠唔籠絡到民心?

3. 歸根究底,咪因為林奠一路唔肯封關。一早講咗,同大陸行得近啲,就會俾人當係大陸嘅一部份。雖然澳門確診數字好低,賭場開番,但係澳門同香港一樣無對大陸封關,國際社會就會同大陸一樣處理,視為疫區。

廣告

4. 你睇台灣,雖然中共一路都矮化台灣係中共其中一個省,但係全世界無國家將台灣同大陸放埋一齊同等處理,就係因為蔡英文政府果斷斷絕大陸往來,無論係口罩同疫情都並無喺台灣引起恐慌,甚至連俄羅斯都話要學習台灣嘅抗疫措施。台灣喺武漢肺炎嘅一役,對外喺國際上確立咗 de facto 獨立政權,對內鞏固咗台灣人民對民進黨嘅執政信心,成為最大贏家。

5. 相比起嚟,林奠作為行政長官做咗啲乜?有無為香港人發聲?有無好似對住泰國、日本政府講「香港嘅疫情控制比鄰近其他地區都好」?香港喺泰國、日本都有駐外經貿辦,有無做過遊說、斡旋?邱騰華作為商經局局長有無衡量過多個國家對香港封關嘅經濟傷害?點解眼白白睇住一個接一個國家視香港為疫區都不發一言?

廣告

6. 睇番我哋嘅政府官員忙緊乜?林奠喺三月五日去咗工聯會熱線中心接電話,向內地港人表達「我係特首」;律政司司長鄭若驊民政局局長劉江華就去親手包裝防疫包。

7. 原來我哋用三四十萬一個月請返嚟嘅主要官員,喺香港相繼被國際社會封殺嘅時候,佢哋嘅職責係聽電話接線生、做包裝工人。咁樣唔係叫親民或者貼地,咁樣叫做浪費公帑,尸位素餐。香港人納嘅稅唔係俾你哋咁用。

8. 商經局局長邱騰華呢?就忙緊應付軍政府首領 PK 鄧嘅旨意,忙於打壓香港電台同扶植香港央視 CCTVB,駐外經貿辦嘅遊說斡旋工作要放低一邊。

9. 成個林奠港共政權,宜家根本無任何管治意志,念茲在茲都係佢喺「篤灰小報告」入面講,嚟緊九月嘅立法會選舉,要為建制派拉票。

10. 好可能因為份報告洩露,班俾人篤背脊嘅建制派上告中央,林奠為咗補鑊,呢輪嘅討好功夫越嚟越露骨。本身林奠已經睇唔起工聯會、民建聯呢啲土共,宜家淪落到要「去工聯會做接線生」呢啲咁低下嘅 job 都要接,同佢高傲嘅性格一啲都唔吻合。

11. 香港嘅實質領導人係軍警政府,林奠以降三司十三局只係附庸,僅餘嘅價值就係確保警謊有無上嘅權限同源源不斷嘅資源,同埋保送個班佢最睇唔起並稱為「表現強差人意」嘅土共入立法會。

12. 當特首淪為工聯會接線生,律政司為包裝女工,港共政府早已名存實亡,香港人真係要自求多福。

發表意見