立場新聞 Stand News

破局:立會過半 = 香港光已復?

2020/3/29 — 23:27

作者圖片

作者圖片

近嚟聽到個講法,話只要立法會過到半就一天都光曬,好似選舉贏就香港光已復咁……但大家諗返四年前,嗰陣都估唔到會有DQ同埋政治犯,所謂「否決議案→解散議會→重選再重選→林鄭下台」既推演未免太樂觀,可能只係對中共抱持「理性計算」既良好意願。

立會唔過半,香港人就會被繼續打壓,完全無懸念;立會過到半,民主派當然要全面攤牌,搏政府停擺到肯回應「五大訴求」。不過,更可能既係,一旦奇蹟地過半,政權一定唔會咁順攤,到時意圖取締現有既立法會,一鋪過DQ70位議員,絕對唔意外。

政權打壓有幾痴線,相信大家記憶猶新,更早之前九七主權移交後既「臨時立法會1.0」直程癲到喺深圳河以北開會,喺非香港領土範圍決定香港事務,遲下照板煮碗洗橫手整個「臨時立法會2.0」真係唔係異想天開。

廣告

除左奉勸精英階層唔好無啦啦寄望實現乜野「一國兩制新約」,或者FF緊年半後既特首選委可以做「造王者」,香港人最緊要知道既係 —— if 立會唔過半,捱打;if 立會過到半,我地要嘗試準備「破局」,度定點反制到時反枱DQ70既中共,如果唔係都會照捱打。

呢個就係今日明報寫文提出「國際攬炒」既原因:議會戰線,應該將關稅區嘅存亡,同現有立法會嘅生死扣連埋一齊,如果政權夠膽取締現有立法會搞「臨立會 2.0」,咁就只能促成「國際攬炒」,力促各國取消獨立關稅區,用呢樣嘢迫使政權喺「五大訴求」讓步妥協。

廣告

可能你會話,就算取締立法會,「國際攬炒」都好難搞得成,但要反制北京,唔捉緊呢個作為政權命脈兼春袋嘅獨立關稅區,都已經諗唔到仲有乜嘢可以左右大局嘅籌碼。DQ70,放諸國際當然違反民主價值同埋三權分立,對喺《香港人權民主法案》通過後嘅西方國家,會帶嚟乜嘢程度嘅震盪,我唔敢寫包單,但肯定比起北京搞《逃犯條例》更嚴重同大鑊。

所以話,依家真正大鑊個位係我哋根本未有足夠嘅戰鬥意識,去應對九月選舉後嘅新局面。無論大黨、無黨、現任定素人,如果我地繼續根據2016年嘅政治語言同成見,以「鬥本土」或者「比較治港藍圖」等方式處理目前陣營分野,或者單用資源考量同擴展勢力作為參選出發點,好可能會令立會過半後破局嘅機會白白流走。

要破局,我相信將選舉戰線同埋國際戰線連結起嚟嘅可能,以「國際攬炒」反制「臨立會2.0」;亦都好歡迎各位拋磚引玉,係選舉呢座大山上面,民主派所有光譜應該有點樣嘅部署,先能夠承托同埋應對得到未來勁動盪嘅政治局勢。

【議會過半想像:以「#國際攬炒」反制「#臨立會 2.0」】

作者facebook

發表意見