立場新聞 Stand News

社會賢達選擇性沉默ㅤ係暴政最大幫兇

2020/3/15 — 12:35

梁卓偉(左)、袁國勇(右)

梁卓偉(左)、袁國勇(右)

喺武漢肺炎肆虐嘅香港,市民大眾高度關注健康,造就咗幾位專家教授,成為社會上現時最具公信力嘅一班人,當中包括港大微生物學講座教授袁國勇及港大醫學院院長梁卓偉教授,佢哋都係林奠座下嘅專家小組成員。

喺道貌岸然、專業人士嘅光環下面,係咪真係如鏡頭下嘅形象所見真心為港人謀福祉?我哋唔可以淨係睇佢哋講咗啲嘢,更緊要嘅係睇佢哋無做到啲乜嘢,刻意迴避啲乜嘢。

袁國勇同梁卓偉都係受勳嘅 GBS 太平紳士,被政府認可嘅社會賢達,其中一項職責就係巡視監獄等羈押院所,接受被扣留者的投訴,避免對扣留人士施行法院判決以外的刑罰。

廣告

但係九個月以嚟,佢哋有無為被拘捕人士、被監禁人士嘅人權待遇出過半句聲?根據《立場新聞》報道,至少百名被告因傷缺席首次聆訊,20 人投訴遭警方毆打,8 人甚至被打至骨折,呢班被拘留人士疑遭警暴酷刑對待,佢哋有無關注過半句?梁天琦被送往最高設防嘅監獄,呢班太平紳士有無研究原因?大量示威者被拒保釋拘留候查後被控方撤控,佢哋有無質疑過濫捕嘅情況?作為太平紳士有無履行過佢哋嘅職責為社會不公義發聲?

呢班人唔單只係醫生,唔單只係傳病學專家,仲係社會上有頭有面嘅人,唔係你同我呢啲普通人。佢哋講一句半句公道說話,已經係新聞一則,已經可以為政權構成一定嘅壓力,已經喺香港嘅歷史上留下一兩段注腳。但係,佢哋選擇沉默。

廣告

有人或者會話佢哋係醫生,唔係政治人物,唔應該做政治表態。事實正好相反,梁卓偉曾任食衞局副局長,官至特首辦公室主任,本身就係一個政治人物。而袁國勇被問及香港政府對南韓等國家封關但係遲遲唔對大陸封關係咪雙重標準,即刻好緊張咁講「我唔識政治」,淨係識科學。但係佢又會受傳媒訪時盛讚陳肇恥呢排受到好大壓力。選擇性嘅不作為同不發聲正正代表佢哋唔係唔識政治,反而凸顯咗佢哋以科學專業為光環,以醫生教授之名騙取市民嘅信心,做徹頭徹尾助紂為虐嘅維穩工具。

退一萬步嚟講,就算只係講公共衞生同傳染病學,佢哋有無刻盡己任,講公道說話?對於醫管局職員要兩星期共用一個面罩有無出過聲?對於屯門醫院喺唔同手術唔同病人共用同一個 N95 口罩,違反美國疾控中心霧化程序後嘅指引,有無提出質疑?即使喺佢哋感染控制嘅專業範疇,有無向醫管局講過半句公道話?

以佢哋嘅身份、地位、專業,如果梁卓偉或袁國勇公開指責一句,比起成個醫管局工會發聲有更大影響力,對醫管局構成更大壓力,但係佢哋選擇咗明哲保身。當市民大眾為警暴嗌到聲嘶力竭嘅時候,佢哋選擇沉默;當醫護為保障自己嘅健康聲嘶力竭咁罷工明誌,佢哋選擇企喺林奠嘅身邊,為政權背書;當記者傳媒為報道真相而被受針對攻擊嘅時候,佢哋更選擇沉默,並無讉責過警暴半句。

作為社會賢達,一句「我唔識政治」係咪就可以推卸哂所有社會責任呢?只係追查感染個案嘅源頭同傳播途徑,係咪足以醫治早已病入膏肓嘅香港?喺大是大非之前,呢班社會賢達同專家只係一班享受住公眾同專業形象賦予嘅光環,明哲保身,為自身利益最大化的偽君子。

發表意見