立場新聞 Stand News

究竟區選算唔算大勝?

2019/11/26 — 12:41

我並無專門研究選舉,以下只係個人觀察,專業嘅搵返蔡子強。😂

1. 建制不可能撼動嘅鐵票,內部評估,大約有 35%,核爆都唔割,包括組織票、老人院票、新移民票、大灣區票、極端意識形態票(又名屈小姐票)。跌破 35% 幾乎唔可能。

2. 如果建制盡攬淺藍到淺黃,最盡大概可以去到 60%,再上嗰 40% 非建制好 solid。呢個光譜主要訴求,包括穩定、溫情,唔太影響呢啲嘢前提下,都會講下價值、公義。反送中運動,有林鄭神助攻,基本上係非建制派盡攬淺黃、淺藍光譜,先有 200 萬人遊行。假如 6.16 之後一個星期選舉,建制可能得返 35% 得票,咁議席可能比依家 58 席再減半,得返 6%。

廣告

3. 西環指揮嘅配票制度超級完善,亦有用大數據,只係當事人都未必知。據建制朋友私下講(當然自己 FC),到 8 月底,運動開始更多衝擊既時候,佢地內部評估係,當刻區選最少比原議席輸多 40 席、最多輸多 80 席,但後者已經有危機,因為非建制派只要同「建制中間派」(自由黨、實證圓桌、專業動力、個別獨立候選人)聯手,都可能得到多數。由於選委議席係西環重要 KPI,要確保萬無一失,就開始有「選定唔選」兩手準備。

4. 到 11 月,建制評估係越來越有信心,相信運動越來越多暴力,會令淺藍、淺黃選民歸隊,開始同自己人照肺,話唔好有幻想唔使選。到咗過去兩個星期,經過三罷、堵路,更加自信民意逆轉,據說某中央領導人傳話,都話相信結果唔會太差;而美國國會極速通過法案,又多咗制約。於是西環落 order,份份報紙賣廣告,自己搞變相公投,覺得假如 keep 到 46-48% 選票,加上堵路令自發投票無咁方便、投票率唔太高,頂多都係輸幾十席,然後宣傳一切如常,就咁翻盤。

廣告

5. 最終結果顯示,西環計錯咗三樣嘢:第一係投票率超過 70%,前所未有,足以抵銷所有鐵票效應;第二係高估非建制陣營、和勇之間嘅分裂,比自己 big data 誤導返;第三係高估咗歸隊既淺藍淺黃,最後有 41%,反映淺黃完全無歸隊,淺藍亦歸唔哂,大家對「止暴制亂」嘅反感,遠大於北京自己呃自己嘅想像;即使真係催咗一啲本來唔投票嘅淺藍,亦比高投票率 offset 咗。

6. 同上屆 2015 年區選相比,當時雨傘之後,建制居然得到 60% 選票,就係盡攬淺藍、淺黃,加上區議會講求「非政治性」街坊服務,同埋非建制陣營運動後嚴重分裂、無咗投票意欲,先有呢個效果。但去返 2016 年立法會選舉,建制直選 + 中間友好,又係得返 44%。所以今次區議會選舉,令建制由 60% 打落 41%,喺咁嘅氣氛之下,依然係超乎想像嘅完美結局。

7. 今後策略,必須固化呢 25% 淺黃淺藍支持運動,呢個階層有知識、有資源、有國際網絡,足以影響根本 momentum 同國際輿論,唔好下下鬧走佢地,佢地呢個階層好要無謂嘅尊嚴,但其實只要方法得宜,可以極速覺醒(同接受好多嘢)。只要呢個真香港人光譜可以長存唔割,逐步建立種種 infrastructure 例如經濟體、海外體,聯繫國際線防止北京鎮壓,和勇合一唔忽然升溫(即係需要慢慢升)唔忽然散水(即係需要 keep 住 momentum),持久戰以年做單位,香港人,應該唔會輸。

8. 如果進取啲,建制鐵票當中,組織票無可能搶、屈票無可救藥,最容易埋手其實係老人院票,新移民住得耐亦會相信香港核心價值,再拉攏被清洗嘅商界,勤力啲,佢地降到 30% 就穩陣好多。

PS:其實我係有 mon 選票 data 同網絡 data 嘅,第一句純粹搞 gag……但專業分析,始終搵番蔡生 💪

 

作者 Facebook

發表意見