立場新聞 Stand News

立法會過半又有奇招,最後突襲!

2020/3/3 — 9:46

政界原本預期民主派立法會雖有進帳,但最多贏到 33 或 34 席,除非有極順利或極樂觀的情況,因為功能組別大部分界別都有一條陰濕規則,就是要早一年行動才符合選民資格,搶攻中的飲食界是少數例外。上一回拙文〈立法會奪半的最後拼圖,原來只需教中小企咁做!〉提出中聯辦也看漏眼的界別,就是進出口界,並提供可行的進攻辦法,繞過一年等待期的陰濕規則,可以成為立法會奪半的關鍵一席。5 月 2 日前要才搞掂哂手續。

我在想,仲有界別可用類似方法進攻嗎?好難搵,畀我搵到一個 — 出版界,屬於「體育、演藝、文化及出版界」(簡稱「體演文出」)四大組別之一。咁就不僅奪半,甚至可以過半了。

出版界

廣告

方法一:

如果你擁有公司已運作一年,有商業登記證,本身無乜業務(例如有好多公司純粹用來 hold asset),突然想搵一樣業務做喎,就係去出版一份報刊喇。只要你註冊咗份報刊出版,你就即刻有資格登記做體演文出(出版小組)的選民啦。唔駛驚,報刊的定義只需要你定期(起碼每半年)出一次畀公眾,有新聞/消息/時事或相關評論,至於長短,曾經有一份《太公報》只係得兩版紙,你咪當做文宣囉,網上大把貨啦。寫嘢寫得 smart啲,咪俾人入你誹謗之類。不過留意一下,如果你份報刊係賣而唔係免費派,咁發行過程就要有持牌發行人了,免費派就唔駛嘅,雖然行規通常都會搵返持牌發行人。法例規定報刊要刊登出版公司的相關資料,詳情請看此連結,仲有埋申請表及範本。

廣告

到時記得要有出版報刊的副本給政府留底,同埋如果超過六個月停刊,註冊就會失效。記得續期,下年仲可以投特首選委。

相關選民資格的 exact wording(前提是公司已運作一年):

「主要經營出版業務並根據《本地報刊註冊條例》(第 268 章)註冊的團體東主」

順帶一提,上回講嘅進出口界有網友反映一些不足之處,雖然嗰招任何行業都用得,但未必任何公司都用得,雖然應無明文禁止 home office 和空殼公司申請進出口牌,但申請過程會有若干行政留難。咁其中的空殼公司其實可以用上述方法入出版界喎。至於 home office 呢,就唔得啦,因為上述方法,根據選舉規則,規定出版團體東主係以出版為主要業務,而 home office 就要用下面的方法二了。

方法二:

如果你擁有一間公司已運作一年,有商業登記證,唔理係咪 home office,你都可以去領發行人牌照,多一技旁身,咁就可以即時有資格登記出版界。簡單來說,發行人就是報刊和零售地點之間的中間人,負責派發報刊。就算你領了牌之後尋找生意失敗,無報刊畀你派報紙,你都仍然有資格登記選民。全港嘅發行人唔多,應該兩位數,因為無乜錢賺同埋量大才有經濟效益。不過你都可以立志做一個唔為錢嘅良心發行人,所以先申請牌照。

相關選民資格的 exact wording (前提是公司已運作一年):

「根據《報刊註冊及發行規例》(第 268 章,附屬法例 B)領有牌照的報刊發行人的團體東主」

申請方法

不論出版報刊註冊還是發行人牌照,政府的服務承諾是 7 個工作天內完成審批申請。理論上根據一份 N 年前的立法會文件,審批基本上是一些行政處理,今日或者將來會否因政治審查而唔批,就不得而知了,總之快手啦。兩者每年費用均為一千元左右,萬一申請唔到就唔駛畀錢。

有什麼申請或法例疑問,查詢請電電影刊物辦 2594 5832。

文化界

如果無公司而又想加入體演文出,可以點?有方法,但趕不及立法會,不過立即行動都趕得切明年投特首選委(更重要!)。如果有三個人註冊社團,社團會章列明宗旨為推廣某樣藝術,有相關條文表示非牟利(網上有 template),去過康文署成功申請特惠場租(低至數十元),運作滿一年,就有資格登記為體演文出的文化小組選民。詳情參看〈終極懶人包,全民湧進小圈子選舉攻略,剩返唔夠三個月!〉。網上有人針對體演文出界別成立了不同群組供人查詢及交流:Facebook / Telegram

荒謬制度,要用荒謬方法玩。

發表意見