立場新聞 Stand News

第二次被捕的經驗分享及溫馨提示

2020/9/6 — 13:02

作者提供

作者提供

在軍政府濫捕年代,被捕者權利你要知!雖然法治已死,都要保障自己。香港人出去參與示威、追求自由、表達訴求,就會有被捕風險,故必須了解被捕者的權利,以保障自身權益。因為思想武裝比行動升級更為重要,認識被捕者的權利,將有助你面對突如其來的不安與恐懼。

事源 7 月 1 日晚上 8 時半,我繼上年 11 月 13 日再次被捕,被控罪名都是涉嫌參與非法集結,現被控多一條藏有工具可作非法用途。雖然兩次被捕都是黑警濫捕,明顯針對議員的行為,但在被捕過程中,我亦體會及注意到部份細節,希望簡單整合以提醒各位手足及同路人。

只要冷靜應對,不要被警方威迫嚇怕就可以,亦要清楚知道自己的權利。

廣告

我無野講,我要見律師!
我無野講,我要見律師!
我無野講,我要見律師!

1.當在現場被拘捕時,必需問清楚警方是以哪一個罪名拘捕你?女被捕人士可要求女警搜身。當搜袋時,發現唔係你既野,千奇唔好認,並大聲指出自己不是物主,否則就被賊贓嫁禍。

廣告

2.當截查或拘捕時,警方一定係兇你,要你打開手機密碼,切忌打開你的手機及密碼,太多案件以手機內的 WHATSAPP 及 TG 群組作為證據,開左手機比警方睇,同自殺送死無分別。作為被捕人士,是不須配合警方打開手機,不要被警察兇到打開,亦不需要理會質疑你偷手機等等的廢話。

3.如果現場有其他市民及記者朋友,記得講名及 ID 給現場人士知道,以便大家搵律師協助你,記得唔好比警察兇到你唔敢出聲。

4.唔該你,上到警車/旅遊巴就扮啞,切忌同差佬傾計,拘捕你的防暴警可能好串,捉你上車的可能係便衣,同你講野好客氣,話只要你合作會幫你求情等等,敵人講乜都好,都一定唔會係好人。

要知道呢班黑警拘捕你,就係想整死你,唔會咁好死放生你的。警察一定係千方百計想套你料,試探你會唔會講錯野,方便日後上法庭作供,砌你生豬肉。(最近,時代廣場拘捕個四十幾人,我係車上聽到個唔夠 20 歲的被捕青年,同個便衣係度吹水,我心諗你係咪第一日出黎抗爭,同警察都有計可傾。)

5.去到警署做登記手續,著號碼衫分流,然後打指模、影個人相(**不要跟從警方不合理要求,例如帶上豬咀、面罩、手套、背包影相)、搜身(要求同性搜身)、沒收證物(例如手機、豬咀、背包、衣物)都屬正常程序。

回答資料方面,我認為只需要交代的你的姓名、ID、電話、住址、出生日期等等的基本個人資料,其他例如職業、收入、學歷都可以唔講。

6.被捕人士有權致電聯絡一名親友或律師協助,一定要堅持提出要求,否則拒絕錄口供。如果聯絡到外界,提供名字、身份證、所在警署,要清屋處理事情,就自己諗方法係電話到告知親友協助,同搵律師盡快前來警署。

如果真係真係都搵唔到律師,其實都唔洗驚,落口供只需要堅持一句,問咩都好、點對你客氣、點氹你都好,都係「我無野講」。正常係你講,然後警方筆錄,最後抄返段聲明,睇清楚所有口供內容簽名就可,記得拎返個口供影印本。

今次 71 被捕,發現警方增加左好多條問題,方便套被捕人士口風。(因為我錄口供既時候,又聽到其他被捕人士真係逐句問題逐句答,我真係無言以對,係咪真係咁天真相信警方可以證明你清白。)

我簡單撮合部份問題:
你點解會係現場一帶出現?
你係點樣去現場?
你幾點去到?
有無參加示威或遊行?
有無其他人同你一齊去?
你示威期間有無叫過D咩口號?
或者攻擊警察同衝擊警方防線?
點解警方比警告叫你走,你唔離開?
有無人叫你來示威?
有無收過咩金錢?
之前有無參與過非法遊行同示威?
警方多次在示威現場發出口頭警告及舉警告旗,點解你仲唔離開?
警方係你身上找到XX物件、XX衣服等等(被捕時的身上證物,如發現被加料,則提出反對),你有咩解釋,用黎做咩?
你係示威期間係著咩衫?有無換過衫?
示威完想去邊到?
有無咩人指示你參與今次示威活動?
參與今次示威活動的目的係咩?
警方檢取你一部 IPHONE 手機做證物,你會唔會同意及打開手機內容比警方偵查?
你身上有無任何八達通?
最後仲有無其他補充?

記得問乜都好啦,全部都答「我無野講」。
記得問乜都好啦,全部都答「我無野講」。
記得問乜都好啦,全部都答「我無野講」。

7.在警署扣留期間,警方需要提供三餐比被捕人士,如果無一定要提出要求,飲水、去廁所、要保暖衣物等等,全部都係被捕人士的權利。親友可以送餐入去警署,但食物會比警方檢查同篩選,理論上有骨的都唔可以,不過都係睇警方心情而定。如果身體不適,可以要求送院治療,必須嚴正提出,因為是人道理由。如果警員唔協助,記得個值日官同相關警員,日後投訴及跟進(雖然都未必投訴得到)

8.在保釋離開警署前,要求致電通知親友拎錢(保釋金)及拎衫褲鞋比你更換,因為現場身穿的衣物會成為證物。至於幾時決定保釋、還是坐爆 48 小時,視乎自己能否決定,唔識就等律師吧,呢個不給意見。

最後,我唔係一名律師,可能當中有所遺漏及錯誤,歡迎指點,只不過是想提一提手足,即使被捕,亦要保障自己。

謹記:無須同警察傾計!錄口供我無野講!

(我發現真係仲有好多,特別係年青人唔清楚呢啲被捕權利。)

後加
1.轉載義務律師:就算覺得自己搞得掂,如果有律師話想見你,都唔好話自己唔駛律師,因為有 D 人係被拒見律師,咁律師分唔到係黑警唔俾你見定係你自己唔想見,最終都係要焗黑警帶你出黎當面確認,搞得仲耐。

 

發表意見