朝雲

朝雲

左膠

2019/10/22 - 15:23

經常聽到警察講一句話

作者影片截圖

作者影片截圖

本文唔講政見。

我聽過唔少警民對罵,唔覺得可以同警察有咩知性討論。若果想學習是非對錯,可以聽陳祖為教授嘅演講

由運動開始至今,作為攝影師嘅我已經見過不下四五次:一大班 full gear、攞住警棍、揸住胡椒噴霧、拎住長槍嘅警察,對住手無寸鐵嘅街坊一邊招手一邊叫陣:「過嚟啦 / 上嚟啦」。

廣告

噚晚 21/10 元朗係最「經典」嘅一次:十幾個警察對住一個女士咁叫。

先唔講警察著住制服可以「合法」動武,而家做乜都唔洗受法律制裁。依啲通通都唔講住。

童黨都識挑機唔可以恃住人多,要深夜約去郊野公園單挑 — 有啲羞恥之心係童黨都知。

重申本文唔關政見,憎恨暴徒唔緊要。我要講嘅係抗爭者冇政權撐腰,佢地動武要冒犯法坐監失業嘅風險,代價係失去半生嘅一切,但佢地依然敢去做。無論佢地係唔係暴徒,佢地有勇氣,好少人有嘅勇氣。

若果你地有抗爭者嘅勇氣而又想叫陣,唔好恃住公權。你地可以揀除低制服,再叫陣約抗爭者決鬥,雙方都冒同等嘅風險,咁先係公平嘅戰鬥。

但你地冇咁嘅勇氣,著住制服攞住警棍壘哂馬,先敢對市民講「過嚟啦」。

我諗做得差人多多少少都有啲英雄主義,但噚晚聽到警察又再咁叫,仲要對住僅僅一位女士,我只係聽都覺得羞恥。

如果仲有啲羞恥之心,就唔好再咁樣向市民叫陣。

✽ㅤ✽ㅤ✽

附:本文可能有性別定型和偏見,請原諒。但警察唔會在乎依啲,我想用佢地理解得到嘅語言,解釋點解阿婆都不齒佢地。

 

作者 Facebook