立場新聞 Stand News

《緊急法》裡面嘅賤格嘢ㅤ政府唔係冇應用過

2019/9/1 — 21:58

政府總部(資料圖片,來源:政府新聞處)

政府總部(資料圖片,來源:政府新聞處)

《大公報》評論講到《緊急法》係一枚「核選項」,今日先認真睇番緊急法啲條文有幾辣,睇完真係原來係勁到核爆:

1. 管制陸路、航空或水上運輸,以及對運送人及東西的管制

(心諗:真係好勁呀。其實,依家黨鐵機場碼頭都可以俾你政府隨便停止服務㗎啦,額外喺車站鴨寮街搜檢屈人拎遮都係攻擊性武器都已經做到,宣佈用《緊急法》把托呀。)

廣告

2. 檢查、管制及壓制刊物、文字、地圖、圖則、照片、通訊及通訊方法

(心諗:連登 Telegram 管到你一早管咗啦,就算用到《緊急法》你都係好難管到;打壓出版同文字發佈你一直都有做㗎啦,只係未做到大陸式網禁,咁叻你咪出《緊急法》試下做囉。)

廣告

3. 逮捕、羈留、驅逐及遞解離境

(心諗:瘋狂濫捕、街坊行過都拉、扶起人告佢暴動罪,趕走外國傳媒記者、俾強力部門捉走李波肖建華,特區政府你樣樣都已經做齊啦。)

4. 限制貿易、出口、進口、生產及製造

(心諗:之前香港眾志年宵連印個 logo 你都已經限著啲廠唔俾佢印啦,依家訂 gear 頭盔自保都俾海關扣查起哂。)

5. 對財產及其使用作出的撥配、管制、沒收及處置

(心諗:政府近幾年已經靜靜雞攪咗幾多個政治團體嘅銀行戶口,凍結佢、唔俾佢用,你心中有數啦。)

6. 授權進入與搜查處所

(心諗:吓,警察走入私人屋苑搜查拉人已經係自己彈出彈入啦,《環球時報》已經譴責埋唔俾差佬入私人商場既大地產商,依家唔少拉示威者嗰陣,都係趁佢出門口個刻就_衝埋入佢間屋狂搜,有咩分別?)

7. 代表行政長官取得任何財產或業務的管有或控制

(心諗:依家你唔聽話,政府理論上都有哂方法收番你嘅權同地,查封你個辦公室、話你係非法組織凍結哂你所有嘢,都唔係未試過啦。)

8. 規定某些人進行工作或提供服務

(心諗:林鄭妳唔好講叫人番工個權啦,妳自己連辭職個權都冇呀妹仔,繼續做香港嘅千古罪人啦。)

9. 修訂任何成文法則,暫停實施任何成文法則,以及應用任何不論是否經修改的成文法則

(心諗:釋法、朕即係法同選擇性執法,唔係已經係香港常態啦咩?)

綜合以上粗淺嘅非法律分析,意思即係話其實近呢幾年政府已經小部分/部分/全套實現咗《緊急法》裡面嘅賤格嘢,只不過佢冇正式宣佈同廣泛應用,所以好多市民已經唔會再俾你嚇到,亦直接成為咗無畏無懼嘅攬炒巴。

數下數下,先發現自 2014 年雨傘之後香港人真係好慘情,5 年裡面原來已經承受咗咁多人身自由打壓嘅苦難,近幾個月蝦到已經冇得再嬲,就算你用唔用《緊急法》,都真係唔駛旨意做到「平暴止亂」。

 

(標題為編輯所擬)

作者 Facebook

發表意見