立場新聞 Stand News

【罷工公投】地盤佬安巴︰「俾其他手足睇到,其實有人仲未放棄」

2020/6/19 — 21:05

職工盟製圖

職工盟製圖

【文:安巴(地盤佬、建築地盤職工總會成員)】

唔係因為見到希望先堅持

坦白講,我對公投結果係唔樂觀。公投門檻係好高,今次要六萬人參與,一聽到就知道個門檻好高,唔容易達到。但係,要諗下一場罷工無返咁上下多嘅人參與,政府根本無壓力。所以,可能明知好困難,甚至,明知今次做唔到,我都希望係同大家認真去做,起碼,可以俾其他手足睇到,其實有人仲未放棄,有人繼續做,而且好認真咁。希望從中大家可以得到鼓勵,大家一齊繼續行落去。

廣告

我們地盤佬,成日話要「死砌爛做襟得屌」、「耷低頭無要求」。但係出面個社會咁樣、政府咁樣,香港墜落咗,對我地無影響咩?

眼見過去十年,香港社會環境變得越來越唔同,再加埋國安法,令我覺得香港更加唔係以前嘅香港,大家選我做工會理事,我好希望喺工會裡面,同大家一齊做啲嘢,所以工會參加呢個公投。

廣告

大家地盤佬都知,地盤大判好多都係紅色資本,又眼見有啲細公司無啦啦上咗市,又見啲政協入市,有啲嘢,大家都感覺得到。啲工程最後判埋判埋,工程費都係俾哂紅色資本。我地成日話,做地盤「十年餓撚死,十年飽撚死」,餓撚死嗰陣,無人理我地,到有得飽嗰陣,又話唔夠人要搵外勞,根本唔輪到你食。邊個理我地?問題喺邊度?

問題就喺個「掣度」,大家係唔係永遠默默咁忍受?我明嘅,有啲嘢無辦法都要低頭,做地盤都係為養頭家,好多嘢都明,我公司都逼我簽支持国安法啦,但依家有方法,係喺安全情況下做得到嘅,希望大家都出手去做。

#620罷工公投 #職工盟反国安法意向投票

 

求助熱線:27708668
FB Inbox:職工盟(HKCTU)
TG:@HKCTU

職工盟 Facebook

發表意見