立場新聞 Stand News

羅智光,你唔識,我教你

2019/8/3 — 12:48

8月2日公務員集會

8月2日公務員集會

羅智光我諗你發夢都估唔到,你寫左果封兩版紙嘅信,反而成為大家集會嘅動力。你嫌平叔嘅演說太過文皺皺,你聽唔入耳?唔緊要。嚟,羅智光。你唔識,我教你。

第一,咩叫政治中立?

平時,無論個人立場有幾反政府,當我地著起件制服,無論喺我面前嘅係警察定係黑社會(或者兩樣都係),總之入得黎醫院就係我嘅病人,我地都盡心醫治 —— 一視同仁,呢啲就係政治中立。

廣告

曾經有人提議,醫護人員喺病房工作嘅時候帶頭盔,抗議警方暴力。我地一致反對。理由係我地唔想令到持相反政見嘅病人,對醫生失去信任,從而拒絕接受治療。因為醫生嘅責任,就係確保所有人,不論政見都得到最適切嘅治療 —— 緊守崗位,呢啲就係政治中立。

即使唔著制服,落到抗爭前線,作為義工急救員都係一樣。我試過喺現場問班兄弟:「如果有個警察受傷跌喺你面前,冇人理,你地救唔救佢?」所有人諗都唔諗就即刻答:「救!」 —— 當仁不讓,呢啲就係政治中立。

廣告

所謂政治中立,就係「唔俾政見影響自己專業」嘅態度,而唔係官員用黎抹殺自由意志嘅藉口。

公務員用自己嘅工餘時間集會,表達民主訴求,你就跳出來叫人「中立」。但過去兩個月,警隊肆無忌憚咁公開宣示政治立場,甚至僭越上級,對張建宗指指點點,你作為公務員事務局局長,有冇出過聲?逾萬警員集會大叫「X 你老母」,公務員事務局去左邊?保安局點解又視而不見?

羅智光你地叫人中立?好意思呀你。

第二,咩叫忠誠?

醫管局員工唔係公務員,但都算係公職人員。所以曾經有人質問杏林覺醒:你地係公僕,份糧係 HA 出嘅,HA 啲錢又係政府批嘅。你地點可以鬧 HA、鬧政府㗎?

我嘅答案係:為人民服務、效忠人民果啲,叫公僕;邊個餵野佢食,佢就跟邊個果啲,叫走狗。

可能,「良知」、「原則」呢啲概念對你嚟講可能太艱深。好,我地撇開呢啲唔講,講錢好唔好?每個月出糧俾 18 萬公務員嘅,就係全港納稅人。如果要效忠,當然係效忠香港人民啦。你憑乜野叫公務員效忠政府同林鄭月娥呀?

即使問責官員脫離左公務員體系,但係你、林鄭、其實同所有公務員都一樣,都係出香港人糧,幫香港人打工嘅「同事」黎㗎咋。效忠?講咩啫你。

昨晚,政府同醫管局,香港兩個最大僱主嘅員工都走上街頭集會。其實,本來呢兩班人,係社會裡面最優薪厚職,抗爭動機最少嘅兩班人。但你地班官居然可以痴線到一個地步,令佢地冒住雨都要出嚟反抗你。無論你點出口術恐嚇,都喝唔住。

我地會唔會贏,仲未知。

但係經過呢一晚,我知,你地輸硬。

作者Facebook

 

發表意見