立場新聞 Stand News

羅致光一盒口罩價值 $245,740

2020/2/16 — 14:55

勞工及福利局局長今日在網誌稱,自己過往廿二天沒有去人多的地方,回政總全部都是自行駕車,沒有乘公共交通工具,「一片口罩都沒有用過,間接是慳了給有需要用口罩的人」。

1. 作為問責官員,喺疫情肆虐嘅情況之下,佢嘅「政績」係「連續 22 日一片口罩都無用過」,當佢慳咗一盒 50 片嘅口罩,用問責局長薪金 $335,100 計算,呢盒口罩嘅「價格」pro-rata 計大概係港幣 $245,740,堪稱貴絕全球。

2. 呢個「政績」仲要值得驕傲到要寫網誌向全港市民宣揚,沾沾自喜,咁喺美國入口十萬口罩嘅香港眾志、喺香港生產口罩嘅王維基、喺屈臣氏公開賣口罩嘅李嘉誠,係咪要立碑供奉?佢係咪覺得香港人要痛哭流涕感激佢呢個慳咗 22 日口罩嘅「父母官」?

廣告

3. 羅致光同你講佢慳口罩嘅方法係「出入都係自行駕車」,唔駛搭交通工具,離地到難以想像,完全暴露咗現任班子「何不食肉糜」式嘅管治思維:「你哋班蟻民學我咁自己揸車、一人 office,坐大房,咪唔駛戴口罩囉!」

4. 作為「勞工及福利局局長」,理應關注低下層勞工同弱勢社群嘅福利,但係佢有無諗過全香港嘅勞工、蟻民,都係逼不得已要搭黨鐵、要迫巴士去返工?有幾多清潔工、掃地工係喺條街度工作?就算係返 office 嘅白領都係絕無僅有咁好似佢咁坐大房 alone office?

廣告

5. 一個負責勞工福利嘅最高級官員係匿埋喺自己間房到寫網誌管治香港,你哋班蟻民仲會對呢個政權有任何期望?

6. 如果特首暨三司十三局外加三萬武裝分子一同消失,都可以做到「一片口罩都沒有用過,間接是慳了給有需要用口罩的人」,亦係全港市民嘅期盼。

 

(標題為編輯所擬)

發表意見